av2" class="NormalTextoNoticia" itemprop="articleBody">
LUGO, 15 Sep. (EUROPA PRESS) -
A Sección Segunda da Audiencia Provincial de Lugo acordou a suspensión do xuízo previsto para esta semana pola 'Operación Muralla' dado que un dos imputados se atopa hospitalizado, en concreto o expresidente da Deputación provincial Francisco Cacharro.
O Tribunal Superior de Xustiza de Galicia (TSXG) indicou que a Audiencia Provincial de Lugo suspendeu o xuízo fixado para os días 17, 18 e 19 de setembro "tras recibir o correspondente certificado médico". Ademais, engadiu que, polo momento, non hai sinalada nova data.
O expresidente da Deputación de Lugo Francisco Cacharro Pardo e outros dous acusados foran citados para os días 17, 18 e 19 de setembro para a celebración na Sección Segunda da Audiencia Provincial luguesa do xuízo pola denominada 'Operación Muralla' por un delito continuado de prevaricación e un delito continuado de fraude á administración.
En concreto, para Cacharro Pardo a Fiscalía pide por un delito continuado de prevaricación a pena de dez anos de inhabilitación especial para emprego ou cargo público e tres anos de cárcere e dez de inhabilitación por delito continuado de fraude á administración, segundo consta no escrito do Ministerio Público, recollido por Europa Press.
Ademais, a Fiscalía considera que Cacharro deberá ser condenado ao pagamento dun terzo das costas procesuais que sexan declaradas de abono. Engade que "alternativamente para o segundo delito", debe ser condenado por un delito continuado de negociacións prohibidas a funcionario a 24 meses de multa cunha cota diaria de 150 euros e catro anos de inhabilitación especial para emprego ou cargo público.
Mentres, para o que foi xefe de servizo de Vías e Obras da Deputación de Lugo entre 1982 e 2005, José Manuel Romay López, a Fiscalía solicita 10 anos de inhabilitación por un delito de prevaricación e por delito continuado de fraude á Administración tres anos de cárcere e dez de inhabilitación. No seu caso, como no de Cacharro, o Ministerio Público alternativamente pide 24 meses de multa cunha cota diaria de 150 euros e catro anos de inhabilitación por un delito continuado de negociacións prohibidas a funcionario.
Mentres, para o terceiro acusado, o enxeñeiro de camiños José Enrique Cacicedo Herrero, a Fiscalía solicita 10 anos de inhabilitación para emprego ou cargo público e tres de prisión e dez de inhabilitación por delito continuado de fraude á administración. E Alternativamente ao segundo delito pide a mesma pena que para os dous anteriores por un delito continuado de negociacións prohibidas a funcionario.
DELITOS
A Fiscalía expón no seu escrito que dun delito continuado de prevaricación son autores Francisco Cacharro e José Manuel Romay, sendo José Enrique Cacicedo cooperador necesario. Alternativamente considera a Romay cooperador necesario.
Do delito continuado de fraude á administración, o Ministerio Público considera autores a Cacharro e Romay, sendo Cacicedo cooperador necesario.
Alternativamente ao segundo delito, a Fiscalía sinala a José Manuel Romay autor dun delito continuado de negociacións prohibidas a funcionario, sendo Cacicedo e Cacharro cooperadores necesarios.
Segundo o relato fiscal, o acusado José Manuel Romay López "ideou a constitución" da sociedade mercantil Senén Prieto Ingeniería S.L. "co propósito de obter un beneficio económico derivado da externalización de traballos de enxeñaría de redacción de proxectos e de dirección de obras que executaba o citado ente local", para "a adxudicación deses traballos a técnicos relacionados coa mercantil en conivencia co órgano de contratación".
Engade que o daquela presidente da Deputación de Lugo, Francisco Cacharro, "era perfecto sabedor das relacións entre José Manuel Romay López e a mercantil Senén Prieto S.L". "Para iso redactou, en data 15 de xuño de 1983, meses antes da constitución da sociedade, un escrito que dirixiu ao presidente no que poñía de manifesto a insuficiencia de medios persoais no Servizo de Vías e Obras para afrontar tales traballos", sinala en relación a Romay López.
No seu relato, a Fiscalía indica que a Deputación Provincial de Lugo adxudicou durante o período comprendido entre os anos 2000 e 2006 un total de 102 contratos de consultoría e asistencia para redacción de proxectos de obras e de asistencia técnica para a supervisión e control de execución de obras, sendo en todos eles adxudicatario o tamén acusado José Enrique Cacicedo, enxeñeiro de camiños, quen traballaba para a mercantil dende o 1 de outubro de 1987.
"Co fin de lograr burlar a lexislación sobre incompatibilidades e obter a adxudicación dos contratos, en fraude para a Deputación de Lugo, José Manuel Romay procedeu á transmisión aparente das súas participacións sociais á súa esposa, que carecía de formación específica relacionada co obxecto social mercantil", relata o Ministerio Público.
A segunda parte da fraude, segundo sostén a Fiscalía, "consistiu en que José Enrique Cacicedo fose quen optase aos distintos contratos licitados pola Deputación de Lugo de consultoría e asistencia para redacción de proxectos de obras e de asistencia técnica para a supervisión e control de execución de obras en nome propio, cando o citado acusado carecía de medios humanos e materiais para asumir tales contratos por o seu mesmo".
"PERFECTO COÑECEMENTO"
A Fiscalía considera, así mesmo, que Francisco Cacharro, en tanto era presidente da Deputación de Lugo dende o ano 1983, data en que se constituíu a mercantil Senén Prieto S.L., "tiña perfecto coñecemento da relación entre José Manuel Romay e a mercantil".
Neste sentido, precisa no escrito que Francisco Cacharro era "perfecto coñecedor" da "incompatible relación do seu xefe de Vías e Obras coa mercantil Senén Prieto S.L ". e "da manobra fraudulenta urdida por José Manuel Romay para lograr beneficiarse dos dividendos que xeraba a contratación pública a través da mercantil que dirixía e dos fondos da cal dispoñía".
Engade que as adxudicacións foron efectuadas polas canles do proceso negociado sen publicidade, que foi "escollido por Francisco Cacharro para dotar dunha aparencia de legalidade ás adxudicacións, simulando a existencia de libre concorrencia á contratación coa Administración cando, en realidade, o acusado e presidente da Deputación era quen decidía a quen invitar e decidía a quen contratar, ditando os decretos correspondentes e asegurándose o resultado mediante a presenza do tamén acusado José Manuel Romay".
