Aymerich advirte que "máis por menos é menos" e sinala que "as cifras cantan" e mostran que "non xestionou"
SANTIAGO DE COMPOSTELA, 11 Abr. (EUROPA PRESS) -
O voceiro do Grupo Parlamentario do BNG, Carlos Aymerich, reprochou á Xunta que se non executou a totalidade dos presupostos en 2010 pola sostenibilidade da Comunidade ao ter que devolver 2.600 millóns ao Estado --no marco do financiamento autonómico-- o que fixo foi "enganar" os galegos cos seus presupostos, posto que estes se elaboraron cando xa se sabía que había que reintegrar esa contía.
En rolda de prensa tras a reunión do seu grupo, o dirixente nacionalista advertiu de que se o Goberno autonómico deixou parte dos presupostos sen executar por ese motivo, entón "o enganou, porque xa sabía que tiña que devolvelos" e recordou que deses 2.600 millóns, 1.900 "os xestionou" o Executivo que dirixe Alberto Núñez Feijóo, xa que se corresponden co exercicio de 2009.
"Se non nos podemos fiar dos presupostos, entón hai unha crise de confianza", sinalou o dirixente nacionalista un día antes de que a conselleira de Facenda, Marta Fernández Currás, compareza na Cámara galega para explicar o peche do exercicio 2010, e no que, denunciou Aymerich, deixáronse sen executar "1.500 millóns de euros".
"Esa austeridade, máis que acelerar a saída da crise, nola agrava", advertiu o voceiro parlamentario do Bloque, quen lamentou que iso confirma que a Xunta "non xestiona", e foi "incapaz" de utilizar os recursos dos que dispón para combater a crise. "Máis ben usounos para todo o contrario", manifestou.
Na súa intervención, puxo algúns exemplos como o da Consellería do Mar, que "só executou o 51 por cento", os departamentos de Infraestruturas e Medio Rural, que deixaron sen executar un 30 por cento cada un; ou o de Cultura, que en ano Xacobeo "apenas executou o 72,2 por cento do presuposto". "Un Goberno galego que non xestiona", concluíu.
"MÁIS POR MENOS, É MENOS"
Con estes datos, indicou, "non é de estrañar que o paro suba, que centos de explotacións pechen ou que pequenas empresas boten o peche", posto que --engadiu-- "déixanse consellerías estratéxicas con máis do 30 por cento sen executar". "Máis por menos --emulando a máxima de Feijóo de 'facer máis con menos'-- é menos" en matemáticas", ilustrou.
Carlos Aymerich reprochou que "as cifras cantan, aínda que diso Feijóo non fala nos conselos e prefire proferir ameazas" e supuxo que "para evadirse, esta fin de semana volveu estar fóra".
"Pois hora de que se poña a traballar", exhortou o dirixente nacionalista, quen advertiu de que malia a "maquillaxe" das cifras que chegarán este martes ao Parlamento, a Xunta fala dun "87 por cento de execución" e a análise pormenorizada é "preocupante".
