Avanzan que mobilizacións en contra da Lei de seguridade cidadá en novembro
SANTIAGO DE COMPOSTELA, 24 Oct. (EUROPA PRESS) -
O voceiro nacional do BNG, Xavier Vence, denunciou este venres que as normas en tramitación actualmente a instancias do Goberno supoñen unha "involución de moito alcance en dereitos sociais, cívicos e económicos", ante o cal coincidiu coa CIG na importancia da "contestación social".
En rolda de prensa tras unha reunión co sindicato, Vence explicou que "o diagnóstico compartido" é que o Executivo está a intentar "radicalizar un modelo inxusto e antisocial" a través da reforma fiscal e das leis de mutuas e seguridade cidadá.
Ao seu xuízo, a primeira delas, "beneficia ás rendas altas" mentres "prexudica ás medias e baixas" e, ao respecto, a deputada do Bloque no Congreso Rosana Pérez censurou que as súas emendas foron "rexeitadas sistematicamente". Pola súa banda, o secretario xeral da CIG, Suso Seixo, opinou que se trata dunha cuestión de "imaxe" do PP en "período preelectoral", pois "non afectará" ao salario máis habitual en Galicia, de 16.000 euros anuais.
É o mesmo que acontecerá, augurou Pérez, coa Lei de Mutuas, que para Vence supón un paso máis no "desmantelamento do Estado de benestar" e na "desregulación de pezas básicas nas relacións laborais e na saúde dos traballadores".
Ademais, incidiu en que implica un "ninguneo" ás competencias de Galicia en materia sanitaria para "devolver o réxime laboral ao século XIX". "Dáse poder a asociacións empresariais para controlar as baixas dende un punto de vista economicista e non por criterios sanitarios", remachou Seixo.
Neste punto, mostrouse moi crítico con que o Goberno trate de presentar aos traballadores "como defraudadores", en lugar de centrarse naqueles que si "son grandes defraudadores, como os banqueiros, os grandes empresarios e os dirixentes do PP e os seus amigos".
"PASO DE XIGANTE"
A liña seguida, o líder do Bloque considerou que a Lei de seguridade cidadá é "un paso de xigante" cara a un "Estado policial", no que as forzas da orde teñen "prerrogativas" para "ditaminar" sobre as mobilizacións e as protestas.
"É unha regresión a unha época pretérita que o BNG rexeita de forma radical", subliñou, e apelou á cidadanía a que "reaccione" contra esta lexislación, que supón "unha involución tremenda nos dereitos conquistados". Ao respecto, o sindicalista apuntou que as multas que poderá impoñer a Policía alcanzan os 30.000 euros.
TRATADO DE LIBRE COMERCIO CON ESTADOS UNIDOS
Finalmente, Vence mostrou a súa "enorme preocupación" pola negociación do Tratato de Libre Comercio entre Estados Unidos e a Unión Europea, pois camiña na dirección de "desregular aínda máis o mercado" e de "reducir o papel do sector público" nos controis, pois "quedará ao pairo das grandes corporacións privadas".
"É un paso adiante na ultraglobalización neoliberal, que arrasa coa soberanía dos pobos e os estados", advertiu, antes de anunciar unha campaña de "información e concienciación cidadá" ao respecto para crear "un estado de opinión crítico".
Pola súa banda, a parlamentaria nacionalista denunciou o "escurantismo" con que se están a levar a cabo as negociacións, tanto por parte do Goberno como da UE. "Pretenden un golpe á democracia, aprobando un tratado dunha transcendencia gravísima sen que sexa ratificado polos estados", interpretou.
Neste escenario, os comparecentes avanzaron que "no mes de novembro" se dará inicio ás mobilizacións en contra da Lei de seguridade cidadá, para pedir a "paralización" da súa tramitación.
