Foto: CONGRESO
av2" class="NormalTextoNoticia" itemprop="articleBody">
MADRID/SANTIAGO, 23 Sep. (EUROPA PRESS) -
A deputada do BNG Olaia Fernández Davila celebrou que o presidente do Goberno, Mariano Rajoy, confirmara que o Goberno se bota para atrás á hora de sacar adiante a reforma da Lei do Aborto, ao seu xuízo, "un triunfo" das mobilizacións sociais e do traballo político da oposición.
En declaracións aos medios no Congreso, a nacionalista galega sinalou que a "retrógrada" lei negaba dereitos ás mulleres, cando en España a normativa vixente dá garantías xurídicas e sanitarias ás mulleres á hora de decidir se queren e teñen que levar a cabo unha interrupción voluntaria do embarazo.
"Esta é a noticia que esperabamos das mulleres, un éxito da mobilización social, das mulleres e tamén do traballo político da oposición", reiterou.
Sobre a reforma da Lei de 2010 que si anunciou Rajoy, de evitar que menores de 16 poidan abortar sen consentimento paterno, Fernández Davila insistiu en que a norma actual xa o contempla.
"É falso que unha menor poida abortar sen consentimento paterno, porque se esta relación non existe, a lei recolle que a menor ten que levar un informe de servizos sociais e ir acompañado por unha persoa de servizos sociais", explicou a parlamentaria do BNG.
AGE
A deputada de AGE Eva Solla atribuíu á "loita social comandada polas feministas" que se conseguise "tombar" a lei "ultra reaccionaria" impulsada polo ministro de Xustiza, Alberto Ruiz Gallardón, o que supón "unha sonora vitoria".
"As loitas na rúa si que serven para algo e esta marcha atrás do PP é unha nova mostra" considerou Solla, "quen avisa de que é preciso permanecer alerta para que non haxa unha nova involución".
A deputada de AGE aposta, así mesmo, pola "ampliación dos dereitos en saúde sexual e reprodutiva", non só no relativo ao aborto, senón tamén en asuntos como a educación sexual.
AGE recorda que levou a petición da retirada da normativa en "numerosas ocasións", pero "o PP de Feijóo se negou e fixo un vergonzoso seguidismo de Madrid no ataque aos dereitos das mulleres". "O machismo atópase na xenética da dereita post franquista", abundou.
