VIGO, 30 Sep. (EUROPA PRESS) -
As centrais sindicais de CC.OO., CIG e UGT manifestaron o seu rexeitamento á decisión adoptada este luns pola Corporación municipal de Vigo e esixiron que, "por respecto ás familias das vítimas e en cumprimento" da Lei de Memoria Histórica, o Concello de Vigo derrube a cruz do Castro "sen máis demora".
Así o trasladaron despois de que este luns os grupos municipais do PP e o PSOE rexeitasen unha moción do BNG para que non se recorrese a sentenza dun xulgado da cidade que obriga á demolición da cruz do Castro, ao consideralo un símbolo franquista.
Tal e como remarcaron os sindicatos, non se trata dunha "cruz simplemente" senón que "é un símbolo fascista ao pé do que se fusilou persoas desta cidade que non eran afíns ao réxime".
Así mesmo, no relativo ao argumento de que nun pleno de 1981 se acordou por unanimidade modificar a finalidade da cruz converténdoa nun monumento a todos os caídos, os sindicatos destacaron que se o Goberno "presume de modificar o seu significado, non debería poñer tantos impedimentos para cumprir unha sentenza".
Sobre esta, recordaron que se trata dunha sentenza xudicial que "recoñece o trasfondo e a significación desta cruz" e que, en cumprimento da Lei de Memoria Histórica, obriga á Casa do concello a retirar o monumento. Esta lei foi "elaborada por Zapatero para devolver a dignidade a unha boa parte da cidadanía" e, "polo tanto, non é entendible o recurso", insistiron.
