Piden á Xunta e ao Ministerio que "non miren para outro lado" mentres explotacións galegas se ven "avocadas ao peche" polos baixos prezos
SANTA CAMBA (A CORUÑA), 1 Ago. (EUROPA PRESS) -
Centenares de tractores, un millar segundo a organización, marcharon este sábado ata Santa Comba (A Coruña) para esixir á Xunta e ao Ministerio de Agricultura que se "impliquen" na busca de solucións para o sector lácteo, ante os baixos prezos que se pagan aos gandeiros polo leite.
Convocados pola Plataforma en Defensa do Sector Lácteo, os vehículos chegaron a este municipio, capital da bisbarra do Xallas --a principal produtora de leite de Galicia--, procedentes de concellos doutras zonas como Bergantiños, Soneira e Fisterra, e chegaron a formar colas de oito quilómetros, colapsando unha das entradas á localidade.
"A situación das explotacións lácteas é insostible e as administracións, dunha vez por todas, téñense que decatar de que este é un problema real ao que hai que buscar unha solución inmediata ou levará por diante ás miles de familias que viven deste sector", explicou en declaracións aos medios o responsable de servizos de Unións Agrarias, Óscar Pose.
Estas solucións, para un dos representantes de Asaja Galicia, Juan García, pasan por "unha recuperación de prezos inmediata". "O que non pode ser é que haxa xente cobrando 21 céntimos o litro de leite, por debaixo dos custos de produción", criticou antes de considerar que "as institucións deben tomar medidas".
"Hai organismos reguladores que teñen que tomar decisións e non o están a facer, porque os contratos que fan as industrias son fraudulentos, non pode ser que esteamos a entregar o leite e que saibamos dous meses despois a que prezo imos cobrar", indicou para recordar que "son os políticos os que teñen a responsabilidade de tomar medidas".
"RESPONSABILIDADE DOS POLÍTICOS"
Neste sentido, o coordinador da Organización de Produtores Lácteos (OPL), Anxo Escurís, lamentou que a masiva mobilización levada a cabo polo sector o pasado 17 de xullo en Santiago para pedir solucións ás institucións "tivese un resultado nulo".
Así, recordou que, tras a protesta, a plataforma en defensa do lácteo galego reuniuse coa conselleira do Medio Rural, Rosa Quintana, e o secretario xeral de Agricultura, Carlos Cabanas, uns encontros que tampouco deron froitos. "En Madrid dinnos que é un problema puntual de Galicia e, aquí, que non estamos tan mal, que cobramos 29 céntimos polo litro, máis que no 2009", lamentou.
Fronte a iso, asegurou que aos gandeiros "non lles dá esa media". "A nós dános en 20 céntimos e, a ese prezo, unha explotación non pode sobrevivir", advertiu para augurar que, con esta tendencia, a "metade" das máis de 9.000 explotacións existentes en Galicia "están avocadas ao peche". "Non nos quedará outra que volver emigrar a Suíza e a Alemaña", apuntou.
FRANCIA, "EXEMPLO
Os distintos representantes sindicais e membros da Plataforma en Defensa do Sector Lácteo presentes coincidiron ao considerar que "non é de recibo" que noutros países como Francia se solucione o problema do lácteo, pactando un prezo do leite, mentres "aquí a Xunta e o Ministerio miran para outro lado".
Neste sentido, tamén en declaracións aos medios, o alcalde de Santa Camba, José Antonio Ucha Velo, sinalou que a xente o que quere "é un trato xusto". "Iso significaría, máis ou menos, ter o que ten Francia, 34 céntimos (por litro) e que se respecte a liberdade de competencia e non nos poñan o leite máis barato aquí", indicou.
Así mesmo, recordou que, só en Santa Camba, hai unhas "800 explotacións". "Dous terzos da poboación, incluídos eu, vivimos do sector lácteo, e non podemos continuar así", manifestou.
MANIFESTACIÓN E PECHE DE COMERCIOS
Tras a tractorada, centenares de persoas manifestáronse polas rúas de Santa Comba dende o multiúsos ata o Concello, ante o cal un neno foi o encargado de ler o manifesto elaborado pola organización. As protestas contaron co respaldo dos deputados Antón Sánchez (AGE) e Tereixa Paz (BNG) e da eurodeputada Lidia Senra (AGE).
Ademais, moitos dos comercios do municipio pecharon as súas portas durante a protesta como sinal de apoio, unha acción reivindicativa que se repetiu noutras localidades nas que o sector lácteo ten moito peso, como o caso de Mazaricos onde, segundo asegurou o seu alcalde, Juan Blanco Rivas, "a maioría da poboación implicouse coa causa".
A deste sábado é a primeira dunha serie de protestas que a Plataforma en Defensa do Sector Lácteo levará a cabo ao longo do mes de agosto nas distintas bisbarras leiteiras de Galicia.
