SANTIAGO DE COMPOSTELA, 1 Ago. (EUROPA PRESS) -
As catro organizacións con presenza nas mesas de negociación, CIG, CC.OO., UGT e CSIF, plantaron este venres á Xunta de Galicia ao levantarse da mesa da promoción interna de corpos xerais, segundo informa a central nacionalista.
Nun comunicado, apunta que consideran "unha aberración" a primeira proposta de borradores que remitiu a Dirección Xeral de Función Pública, e as modificacións aceptadas tras a primeira reunión como "un atropelo a todos os empregados públicos".
Esixen por iso que a Xunta retire esta proposta "e volver ás bases do ano 2009 como punto de partida negocial", indica a CIG. "Entendemos totalmente inxustificado o cambio das bases", engade.
Os empregados públicos, sostén a organización, están "fartos da criminalización sistemática", de recortes salariais e da privatización de servizos, así como de despedimentos. "A todo isto agora hai que engadir a negación do dereito á promoción interna coa pretensión da Xunta de impoñer unhas bases contra natura", denuncia.
Ao seu xuízo, ditas bases "cercenan os dereitos do persoal cunhas probas nas que a obxectividade desaparece e que van poder ser interpretadas polos tribunais que nomeará a dedo o Partido Popular". "O que provocará que a subxectividade e o clientelismo desembarquen con total impunidade nas probas de promoción do persoal", advirte.
Critica tamén que a Xunta "tratase de influír na negociación fixando as datas nos últimos días de xullo e primeiros de agosto nunha clara intención de que ao persoal non lle chegase a información". Malia iso, asegura que os catro sindicatos recibiron "un dos maiores números de alegacións" que recordan.
