Levará as súas alegacións ao Parlamento e ao Valedor do Pobo e pide que se eleven ao Consello Consultivo
SANTIAGO DE COMPOSTELA, 28 Nov. (EUROPA PRESS) -
A CIG presentou alegacións ao borrador de decreto de creación da Axencia Galega para a Xestión do Coñecemento en Saúde, "unha norma que, segundo denunciou a central sindical, só regula cargos directivos fose de cadro" e non ofrece "estabilidade" ao persoal investigador.
En rolda de prensa, a responsable de CIG-Saúde, María Xosé Abuín, asegurou que o borrador de decreto é un "despropósito" e suxeriu que é "corrupción administrativa", xa que "non se regula a natureza das prazas, se as xefaturas son de persoal sanitario ou non sanitario, e non regula os requisitos de acceso, solvencia académica, profesional, técnica ou científica".
Acompañada doutras membros de CIG-Saúde, María Xosé Abuín advertiu de que o decreto que propón a Xunta regula que o director vai ter consideración de alto cargo da administración, con rango de director xeral, mentres que os responsables de áreas e das unidades de xestión non se especifica qué tipo de categoría.
Ao respecto, indicou que, como denunciou no seu momento, había unha "auxiliar administrativa" que realizaba funcións de xefe de servizo, para as cales non tiña a categoría demandada. Estes casos, ata unha vintena, foron atribuídos a un "erro" por parte da Consellería de Sanidade ao ser preguntada por parte deste sindicato, ao que lle consta que se eliminaron do directorio e que se deixaron de pagar os "programas especiais" que se lles retribuía.
Neste sentido, Abuín concluíu que a axencia crea "para dar cobertura a todas as xefaturas" que agora ocupan este tipo de persoal, mentres que "os grandes esquecidos" son o persoal investigador do Miguel Servet, actualmente adscritos aos hospitais universitarios da Coruña e Santiago.
PERSOAL INVESTIGADOR
Sobre este extremo, referiuse ao decreto para advertir que, tal e como recolle o borrador do decreto, "os contratos laborais dos investigadores en calquera das súas modalidades estarán supeditados ás previsións que as leis anuais de presupostos determinen en relación coas autorizacións para realizar este tipo de contrato".
María Xosé Abuín recordou que os 24 profesionais do programa Miguel Servet, máis un que se incorporará en xaneiro, superaron un proceso de acceso "altamente competitivo" e no que a propia Consellería de Sanidade participou activamente na avaliación final.
Ademais, sinalou que dese total, 11 están en fase de "ser estabilizados", é dicir, xa encadearon o número de contratos temporais máximo que podían ter. Non obstante, denuncia a CIG, no decreto da axencia non se recolle esta posibilidade de "estabilización".
Os investigadores examináronse na sede do Instituto Carlos III por un comité de expertos e a maioría alcanzaron o maior nivel de avaliación, o nivel A. "pero isto non debe ser suficiente para o Sergas, que pretende deixar no limbo normativo e na precariedade laboral a estes profesionais que nalgúns caos levan 14 anos de traxectoria investigadora", advertiu a representante sindical, quen sinalou que esta actuación "prexudica a toda a sociedade" no seu conxunto.
PARLAMENTO
A CIG advirte de que levará esta cuestión a todos os grupos do Parlamento e ao Valedor do Pobo. Tamén pedirán que se envíe ao conselo Consultivo as alegacións que se presenten ao decreto de creación da axencia.
O sindicato solicita, así mesmo, a retirada deste decreto e que se inicie unha negociación "real co persoal afectado", e na que se teña en conta a súa opinión. "Non se pode crear un axencia do coñecemento en saúde co único fin de colocar persoas afíns en postos de dirección", denunciou.
