SANTIAGO DE COMPOSTELA, 4 May. (EUROPA PRESS) -
A cobertura total do sistema de protección por desemprego situouse en Galicia en marzo no 50,99%, case punto e medio por debaixo do 52,44% de febreiro, con 108.721 beneficiarios fronte aos 213.220 parados que había na comunidade no terceiro mes do ano -sen contabilizar os 18.577 que se correspondían co colectivo sen emprego anterior-. No conxunto estatal, esta taxa está no 53,3%.
En marzo -os datos de prestacións sempre van cun mes de atraso respecto ás cifras de paro, de aí que o Ministerio de Empleo publicara este mércores as cifras do gasto en desemprego de marzo e os datos de paro de abril-, na comunidade galega rexistráronse 33.436 solicitudes de prestacións e concedéronse 32.072 altas, cun prazo de recoñecemento medio de 1,05 días.
Dos 108.721 beneficiarios, 43.399 sono de prestacións contributivas, 52.749 de subsidios, 11.643 de rendas activas de inserción e 930 do programa de activación de emprego.
En canto ao gasto, sumou 86,57 millóns de euros durante o terceiro mes do ano na comunidade galega, e a contía media da prestación contributiva percibida por beneficiario situouse en 779,7 euros mensuais.
Do total, 3.946 beneficiarios en Galicia son estranxeiros, 2.186 deles procedentes de países non comunitarios e 1.042 dalgún estado comunitario.
