FERROL, 28 Jul. (EUROPA PRESS) -
O Concello de Ferrol, a través da Concellaría de Benestar Social, anunciou a súa intención de asinar o 30 de xullo a renovación do convenio de colaboración coa Cociña Económica, que ascende a 75.000 euros.
Dende a administración local infórmase que a sinatura do convenio é posible despois de que a semana pasada quedase definitivamente fiscalizado pola Área de Intervención e recibira o visto bo de Intervención e Secretaría.
Así mesmo, a casa do concello sostén que se reduciron os prazos de tramitación do acordo coa Cociña Económica en comparación cos dous últimos exercicios.
Este mesmo luns a Cociña Económica anunciou a través dun comunicado que deixaría de atender a partir do 1 de agosto a 90 usuarios, destinados polos Servizos Sociais, debido a que o convenio de colaboración co Concello non se renovara dende que finalizou o anterior en novembro de 2013.
Dende o Concello de Ferrol sinálase que, a principios de xaneiro, a Concellaría de Benestar Social comunicou ao presidente da Cociña Económica a decisión de continuar coa colaboración municipal e, segundo indica a administración local, se lle propuxo un aumento da achega ata os 80.000 euros, que foi rexeitado pola entidade.
En xuño, segundo a información municipal, o presidente da Cociña Económica deu o visto bo ao texto definitivo do convenio, "ao que se chegou despois de varias modificacións obrigadas polos informes dos técnicos municipais e por propostas feitas pola entidade que se introduciron no documento".
