VIGO, 24 Nov. (EUROPA PRESS) -
O Tribunal Constitucional rexeitou admitir a trámite o recurso de amparo promovido pola Asociación Viguesa pola Memoria Histórica do 36 contra a sentenza do Tribunal Superior de Xustiza de Galicia (TSXG), que revoga unha resolución anterior e permite ao Concello de Vigo manter no Castro unha cruz, considerada "símbolo franquista" por esta asociación.
Tal e como consta na resolución, notificada o pasado venres, a Sección Primeira da Sala Primeira do Tribunal Constitucional non admite o recurso de amparo ao entender que hai "inexistencia de violación" de ningún dos dereitos fundamentais que tutela.
Por iso, o TC decretou que, en caso de que o Ministerio Fiscal non interpoña recurso de súplica dentro do prazo legal, se arquivarán as actuacións iniciadas pola asociación viguesa "sen máis trámite".
A asociación, que este martes trasladou o seu pesar pola resolución, pedía que se invalidase unha sentenza do TSXG de xaneiro deste ano, na que o alto tribunal galego dá a razón ao Concello de Vigo no seu recurso de apelación contra unha resolución dun xulgado da cidade, que ordenaba retirar a cruz do Castro, en aplicación da Lei de Memoria Histórica.
Nesa sentenza, o TSXG sinala que ese monumento xa non ten o significado orixinal de exaltación dos heroes do bando nacional da Guerra Civil, e que está "desprovista de toda simboloxía fascista", a mesma postura que defende o goberno municipal de Abel Caballero.
Segundo o TSXG, "non pode compartirse que siga tendo ese compoñente de exaltación", xa que desapareceu a súa "carga política". "Pode ser contemplada como un elemento relixioso, aínda que non fose o seu significado orixinario, posto que é evidente que se trata dunha cruz latina", reza a resolución.
VOTO PARTICULAR
Non obstante, o fallo do TSXG contempla o voto particular da maxistrada Cristina María Paz Eiroa, que defende a sentenza emitida polo xulgado contencioso-administrativo de Vigo. Así, sinala que esa resolución foi "clara, precisa e motivada".
Segundo esta maxistrada, a lei indica que as administracións públicas "tomarán as medidas precisas" para a retirada de placas, monumentos ou outros símbolos conmemorativos da Guerra Civil, a vitoria franquista ou a ditadura, polo que entende, "como entendeu o xuíz (de Vigo)" que "a cruz ha de ser retirada" en arranxo á Lei de Memoria Histórica de 2007.
