Bascuas e López replican a Feijóo que "non hai forza máis inútil que o PP, que crea problemas á cidadanía en vez de resolverllos"
SANTIAGO DE COMPOSTELA, 16 Abr. (EUROPA PRESS) -
Compromiso por Galicia (CxG) lanzou a súa candidatura ás eleccións ao Parlamento Europeo do próximo 25 de maio e destacou que está composta por "xente do común" no arranque dunha campaña "construtiva e propositiva" por unha Europa "máis social, que poña a política por enriba da economía".
No parque de Bonaval, en Santiago de Compostela, o voceiro de CxG, Xoán Bascuas, e o candidato cabeza de lista, Paulo Carlos López, replicaron ao líder do Partido Popular de Galicia, Alberto Núñez Feijóo, quen dixo que o resto de formacións políticas son "irrelevantes" nestes comicios.
"A arrogancia dá a ver o seu catadura moral e o seu talle político", subliñou Bascuas, mentres que López destacou que "non hai forza máis inútil que o PP, que o que fai é crear problemas á cidadanía en vez de resolverllos".
Coincidindo coa xornada en que se rexistran as primeiras candidaturas e coalicións para as eleccións europeas, os membros de CxG comprometéronse a desenvolver unha campaña que, "coa súa marca e denominación, programa e candidatura propias", sexa "construtiva" e afastada de "descualificacións".
CANDIDATURA
Son sete persoas --Paulo Carlos López López, Óscar Carballo Iglesias, Inma López Silva, Teba Conde Herrezuelo, Victor Álvarez Arias, Andrés Núñez Rajoy e María Xosé Alfonso Torres-- de distinto perfil, "basicamente xente nova, dende persoas que traballan por conta allea a persoas que teñen a súa propia microempresa e persoas que viven, padecen e senten os mesmos problemas que pode padecer calquera cidadán", chamou a atención Bascuas.
"Non pretendemos presentar ningunha heroína do século XIV no século XXI, senón que, precisamente, pretendemos presentar cidadanía do común que vive, padece e sente problemas do común", resaltou.
Pola súa banda, Paulo Carlos López, candidato máis novo no conxunto do Estado español, coincidiu en que se presentan "xente capaz, nova e comprometida". "Xente do común que está para resolver os problemas da cidadanía porque son os seus propios problemas", incidiu.
"Ilusionado" no inicio da campaña, remarcou que avogará "por esa Europa máis democrática, máis social, das persoas, que poña a política por enriba da economía". Neste sentido, apostou por "dignificar" a política xa que "existen outras formas" dentro do marco da "honestidade" e na loita contra a corrupción.
"Somos unha forza política nova, temos practicamente un ano e medio de vida, pero cada vez estamos máis asentados no territorio e esa irrelevancia nun meses vaise converter nunha relevancia palpable e imos optar a ser unha forza política a ter en conta", finalizou o número 1 do cartel de Compromiso por Galicia para os comicios á eurocámara.
