Piden que os responsables desta "trama sexan axustizados" e que os xuíces cheguen "ao fondo de todo isto"
VIGO, 27 Nov. (EUROPA PRESS) -
Decenas de membros da Plataforma de Afectados por Preferentes e Subordinadas Vigo-Val Miñor-O Morrazo concentráronse este xoves ante os xulgados da cidade olívica para esixir "que se faga xustiza" e que os responsables desta "trama sexan axustizados".
En declaracións aos medios, o representante da plataforma de Vigo-Val Miñor, José Manuel Estévez, incidiu en que o que máis les "interesa" é que todos os afectados recuperen os seus aforros, pero tamén que se faga xustiza, porque mañá vai pasar a mesma situación" en calquera outra gran multinacional ou grande empresa".
Así, remarcou que son os xuíces os que "teñen que tomar accións" e, por iso, pediu que non esquezan eles nin os abandonen. "Teñen que ver a documentación que se lles entregue, teñen que analizala ben e teñen que chegar ao fondo de todo isto", comentou Estévez, que recalcou que os xuíces "saben o que pasou e poden actuar en consecuencia".
"O que hai que dalos é un exemplo, se o Goberno non o fai o ten que facer o propio pobo, nós somos o pobo e temos que procurar que os responsables desta trama, os que nos fixeron sufrir, sexan axustizados", apostilou.
Os preferentistas organizaron esta mobilización na mañá deste xoves para protestar, así mesmo, pola "falta de compromiso e implicación da xustiza", que inadmitiu a trámite a querela que presentaron contra o Consello de Administración da extinta Caixanova.
Así as cousas, comunicou que nun xulgado de Madrid presentaron un recurso de reforma e outro de apelación e noutro de Vigo presentaron tamén un recurso de reforma, polo que agora se atopan "esperando a que os tribunais se pronuncien ao respecto".
SITUACIÓN XUDICIAL
Sobre iso, asegurou que achegaron "documentación substancial suficiente" como para demostrar "que o banco ordenaba vender este produto a detallistas en cantidades pequenas, por que se vendía este produto e cál era a finalidade". "Non obstante din que non haxan substancia abonda como para abrir unha investigación", apostilou.
"Por un lado, dinnos en Madrid que a denuncia que presentamos é a mesma que presentamos en Vigo hai ano e medio, e en Vigo contradinse dicindo que non é a mesma, que é totalmente nova,", asegurou o voceiro dos afectados, que indicou que o Ministerio Fiscal tamén se contradí", posto que en dous pronunciamentos distintos sinala que "os denunciantes son os mesmos e as causas son as mesmas, e en outro di que non".
"Entendemos que a xustiza está a xogar un poquito a eu non fun, eu non son, isto non é para min e pasándose a pelota os uns aos outros", lamentou Estévez, que criticou que "ao final igual non entran nin sequera" a estudar o caso, cando "en case todas as entidades entraron a fondo" e "as causas son as mesmas".
