A institución aposta pola "transparencia" e retransmitirá vía internet a apertura das plicas de concursos e as xuntas de goberno
OURENSE, 22 Abr. (EUROPA PRESS) -
O presidente da Deputación de Ourense, Manuel Baltar, defendeu este martes que apostou "por ser contundente" no código ético que a institución provincial aprobará este mes e que determina "tolerancia cero" a calquera tipo de regalo, en termos similares ao texto aprobado recentemente polo Goberno galego.
En concreto, o texto da Deputación recolle que ningún cargo electo nin tampouco o persoal ao servizo da administración provincial poderán ofrecer, conceder, solicitar ou aceptar "regalos ou dádivas, favores ou compensacións, en metálico ou especie", calquera que sexa a súa natureza, que poidan "influír no proceso de toma de decisións".
O código remarca tamén que non se poderá aceptar "ningún tipo de regalo ou servizo que sexa entregado por razón do seu cargo, agás os de carácter protocolario ou institucional --para os que o texto, a diferencia do aprobado da Xunta, non fixa unha contía máxima--. Con todo, Baltar subliñou que "respecta o límite de 90 euros" fixado polo Goberno que dirixe Alberto Núñez Feijóo e insistiu en que o seu código aposta pola "tolerancia cero" para os regalos.
Igualmente, determina que calquera regalo recibido que "contraveña" o que recolle o código deberá ser devolto inmediatamente e comunicada esta circunstancia á Secretaría do Comité de Ética, que levará un rexistro ao efecto de deixar constancia deste tipo de situacións.
De "non ser razoablemente posible a devolución" do regalo en cuestión, nun procedemento tamén moi similar ao que se seguirá no Goberno galego, o código provincial determina que se entregará ao departamento de Tesouraría que, tras emitir o correspondente recibo, o destinará a fins de interese social.
APROBADO ESTE MES
Baltar informou en rolda de prensa do fin dos traballos da comisión creada para elaborar o código ético da institución, a partir da súa proposta "persoal" dada a coñecer o pasado mes de febreiro. Tras cinco reunións, o voceiro do PP provincial, Prácido Álvarez, e o propio Baltar remataron un texto que irá ao pleno do venres día 25 de abril para a súa aprobación como código ético e de conduta.
Na súa comparecencia, o presidente provincial detallou algúns aspectos incorporados que supoñen unha "mellora" sobre o texto inicial, como a consideración de que os deputados que ocupen ademais cargos orgánicos no seu partido "non deben menoscabar o exercicio das súas funcións na Deputación polo desempeño dos seus cargos", é dicir, que a súa función como deputado sempre se antepoña ao de cargo orgánico.
Ademais, no portal web poderase consultar información sobre todos os contratos en vigor, e asistir á retransmisión, pola mesma vía, da apertura de plicas en calquera proceso de concurso público. "Así as empresas evitarán desprazarse persoalmente a estes actos", concretou.
COMISIÓN DE SEGUIMENTO
"En aras da transparencia", ratificou Baltar, introdúcese a posibilidade de seguir vía internet, ademais dos actos públicos de apertura de plicas, as reunións das xuntas de goberno cos temas delegados polo pleno, e as das Comisións Informativas previas ás sesións plenarias.
O código ético da Deputación será aprobado polo menos cos votos do PP, que son maioría, pois o PSOE votou a favor da proposta en febreiro, o BNG abstívose, pero ningún dos dous partidos participou na elaboración, tras presentar condicionantes nos primeiros minutos da primeira reunión, algúns relacionados coa presenza nos asentos de deputados, de varios alcaldes imputados xudicialmente.
Nos tres meses seguintes, segundo Baltar, constituirase unha comisión de seguimento do código ético integrado por funcionarios elixidos por sorteo, representantes do Colexio Oficial de Secretarios e das universidades, ademais do organismo Transparencia Internacional, co presidente en España da cal se reunirá o presidente da Deputación nos próximos días, segundo detallou.
A preguntas dos xornalistas, Baltar remarcou que o código se aplicará a todos, deputados e funcionarios, "independentemente do ámbito da súa xestión".
