Rueda: "O único que pedimos é que se entenda que isto é un debate de ideas, non ten que haber rivalidades nin se vai producir desunión"
SANTIAGO DE COMPOSTELA, 8 Feb. (EUROPA PRESS) -
O secretario xeral do PP galego e vicepresidente da Xunta, Alfonso Rueda, comprometeu "total imparcialidade" da dirección autonómica na carreira por suceder a José Manuel Barreiro á fronte do PP de Lugo, na que participarán, en principio, dúas candidatas: a alcaldesa de Mondoñedo e voceiro provincial dos populares, Elena Candia, e a delegada da Xunta na provincia, Raquel Arias.
Candia 'oficializou' a súa candidatura o venres, poucas horas despois de que Barreiro ratificase que focalizará o seu papel político en Madrid, como voceiro dos populares no Senado. Como vicepresidente na súa lista propón ao subdelegado do Goberno, Ramón Carballo, e dentro do partido ninguén dubida de que ten a absoluta confianza de Barreiro.
Arias, que este luns ratificou que disputará a Candia o liderado provincial, xa se postulou no seu día para presidir a Deputación lucense, aínda que finalmente foi a dirixente mindoniense a que ocupou este posto durante un breve período, paso facilitado polas desavinzas internas do PSOE e ao enfrontamento co alcalde de Becerreá, Manuel Martínez.
O peso de Arias como delegada da Xunta en Lugo levou a moitos a identificala entón como a candidata de Alberto Núñez Feijóo, aínda que este lanzou para o proceso que agora está en marcha --ao igual que Barreiro-- reiteradas mensaxes de imparcialidade.
E é que, ademais do seu rexeitamento a que poidan xurdir conflitos que debiliten ao partido en calquera provincia para as eleccións autonómicas deste ano, Núñez Feijóo está centrado no seu propio debate interno e pendente de aclarar cál será o seu futuro político, se opta ou non a un terceiro mandato na Xunta.
"MAGNÍFICAS CANDIDATAS"
Nesta conxuntura, Rueda defendeu este luns que as dúas son "magníficas candidatas". "Dígoo porque coñezo ás dúas e os congresos son para que se presente quen o estime oportuno", apuntou o número dous de Feijóo na Xunta e no partido, quen recordou, ademais, que o propio prazo de Pontevedra aínda non se pechou e el mesmo podería ter un competidor.
Tras sinalar que non solo en Lugo senón tamén na Coruña, hai máis dunha candidatura, remarcou que, pola súa banda, ten unha "relación fluída" con Candia e con Arias.
Á segunda, apuntou que a coñece especialmente polo seu carácter de delegada da Xunta en Lugo -as delegacións territoriais están ligadas á súa área de xestión autonómica-, pero tamén resaltou que o une unha "relación moi fluída" coa alcaldesa de Mondoñedo, coa que puido estar en contacto sobre todo cando ocupou temporalmente a Deputación.
Así as cousas, garantiu total imparcialidade, como non pode ser doutro xeito". "Creo que iso é o que nos pide a xente; son os militantes de Lugo os que teñen que decidir, as dúas son magníficas candidatas e as dúas o poden facer moi ben", reiterou.
"NON FALAMOS DE RIVAIS"
Nesta conxuntura, Rueda proclamou que "o único" que se pide dende o partido é que "se entenda que isto é un debate de ideas, que non ten que haber rivalidades nin se vai producir ningunha unión". Máis ben "ao contrario", deu por feito que o partido "sairá reforzado" do próximo conclave do 6 de marzo en Lugo.
E é que, advertiu, o proceso provincial do PP de Lugo non é equiparable "a unhas eleccións", polo que non se fala "de rivais", senón de "compañeiros de partido" que poden ter "ideas diferentes". Agora, engadiu, toca "confrontalas" e despois será a militancia a que decida.
"Non hai ningún problema porque haxa dous candidatos na Coruña ou Lugo, pode ser mesmo enriquecedor", resolveu.
