Subliña que "tódolos que gobernaron España dende o Partido Socialista" están "a favor" de que "se deixe gobernar" ao PP
SANTIAGO DE COMPOSTELA, 28 Ago. (EUROPA PRESS) -
O presidente da Xunta, Alberto Núñez Feijóo, explicou este domingo que os datos da Consellería de Facenda acreditan que Galicia pechará este ano cun crecemento do 3 por cento, medio punto máis, recordou, do previsto inicialmente. De igual modo, tamén indicou que a comunidade finalizará o ano cunha taxa de paro do 17 por cento, un 1 por cento menos do calculado a principios de ano.
Por iso, considera o tamén líder dos populares galegos e candidato á reelección que a economía galega "está no mellor momento dende o punto de vista macroeconómico dende o ano 2008".
Nunha entrevista en Radio Galega recollida por Europa Press, Núñez Feijóo tamén se referiu ás próximas eleccións autonómicas: "A Nosa sensación é que é moi difícil conseguir unha maioría estable na situación política de dispersión do voto que hai", recoñeceu, para logo engadir que, aínda que se trata dun "reto francamente complexo", se se produce "unha votación masiva nas urnas" entón esa meta si "se"pode conseguir".
E é que, na súa opinión, sería unha "moi mala noticia" que Galicia "se meta nunha gran lea": a lea, precisou, dos "multipartitos". De feito, sostén que se trata dunha alternativa á "estabilidade e responsabilidade" que le "honra" presidir.
Cuestionado sobre quen encabeza esa alternativa, o líder do PPdeG limitouse a dicir que non é capaz de sabelo. "Enfrontámonos a unha lea", asegurou, para logo apostar por un goberno cun proxecto "social e económico" que non estea "secuestrado", precisou, por unha "amálgama multipartita" que, á súa vez, ten "profundas leas internas".
Sobre o cruzamento de declaracións vivido no PSdeG tras a modificación das listas de Ourense e Pontevedra por parte de Ferraz, Núñez Feijóo indicou que se trata dunha cuestión que "lle corresponde a eles desentrañar". Non obstante, si sinalou que non é capaz de entender qué razóns levan os socialistas a "ter un partido distinto en cada provincia".
A continuación, opinou que os socialistas están "máis preocupados" por "intentar" que as "mareas de Podemos, eles mesmos e o BNG se unan tras as autonómicas, "non para gañar" senón para "esperar que ao PP lle falte un escano".
Sobre En Marea, considera que é "moi duro" para un político "veterano" como Xosé Manuel Beiras que "non o queiran como cabeza de cartel". Con todo, argumentou que son os integrantes da confluencia os que "dirixen as súas propias leas" e que, polo tanto, non pode "nin opinar" nin se meter nestes asuntos.
SITUACIÓN NACIONAL
En clave nacional, o líder dos populares galegos instou o secretario xeral do PSOE, Pedro Sánchez, a que "se de conta de que todos os que gobernaron España dende o Partido Socialista" e "todos os que tiveron responsabilidade en España como ministros ou como expresidentes do Goberno socialista" están "a favor" de que "se deixe gobernar o partido que gañou as eleccións dúas veces".
De feito, o presidente do Goberno, Mariano Rajoy, asegurou este domingo que, tras pechar un acordo con Cidadáns e o previsible apoio de Coalición Canaria, xa ten un apoio de 170 deputados para a súa investidura, pero admite que, aínda sendo "importantes", non resultan suficientes, polo que volveu sinalar o PSOE.
