SANTIAGO DE COMPOSTELA, 29 Ene. (EUROPA PRESS) -
O presidente da Xunta e líder do PPdeG, Alberto Núñez Feijóo, proclamou este xoves que "a estabilidade política en Galicia está garantida ata 2016" conforme o mandato recibido nas últimas eleccións autonómicas e fronte aos presidentes que fan só "o que lles convén" a eles e aos seus partidos.
"Durante todo este tempo no que asistimos a que cada presidente fai co Parlamento do que forma parte ou coa administración que intenta dirixir o que lle dá a gana para beneficiarse así o seu partido, xustamente a tentación foi a contraria: enviar unha mensaxe de estabilidade na Xunta e nas institucións autonómicas", sentenciou Feijóo, nun contexto marcado pola cita electoral catalá e o adianto andaluz.
Na rolda de prensa posterior ao Consello da Xunta, subliñou que esta estabilidade institucional se traduce na "estabilidade social e económica" da comunidade, para engadir que este é "un activo importantísimo" porque non hai "ningunha organización xa sexa sinxela ou complexa que sexa capaz de funcionar correctamente con cambios constantes nun período de meses.
"E non hai ningún presidente dunha comunidade que poida facer o que lle dá a gana, o que lle convén a el e ao seu partido con independencia do que convén os cidadáns", apostilou.
Dito isto, concluíu que o "activo máis importante" que ten un país, no seu caso unha comunidade autónoma, é a "estabilidade política", antes de proclamar que "a estabilidade política en Galicia está garantida ata o ano 2016", conforme o mandato dado polos galegos na última cita coas urnas de 2012.
