SANTIAGO DE COMPOSTELA, 19 Dic. (EUROPA PRESS) -
O presidente da Xunta, Alberto Núñez Feijóo, valorou este venres a "boa noticia" que supoñen os novos contratos programados entre Iberdrola e Navantia e resaltou que a diversificación supón unha "oportunidade" para o naval galego.
Así, o xefe do Executivo galego asegurou que este anuncio é "unha boa noticia non só dende o punto de vista do emprego", senón tamén "dende o punto de vista da diversificación", a través da que Navantia Fene "pode acreditar nos mercados que fai máis cousas que excelentes barcos".
"A enerxía eólica mariña é unha enerxía que está en ascenso, e se acreditamos e cumprimos ese contrato, con calidade e prazo, estamos ante unha oportunidade que se abre para Navantia", sentenciou Feijóo.
De forma paralela, o presidente galego confiou en que durante o ano 2015 haxa máis noticias para o naval galego e poida seguir "afondándose na diversificación, en facer máis cousas, como grandes estruturas.
Núñez Feijóo recoñeceu que "incrementar o valor engadido" de Navantia e "os postos de traballo" é necesario especialmente tendo en conta que Ferrol é "o lugar con máis desemprego de Galicia".
Feijóo reunirase en xaneiro co presidente de Iberdrola para coñecer o contido e alcance deste novo contrato e valorar outras posibilidades de actuación.