SANTIAGO DE COMPOSTELA, 23 Oct. (EUROPA PRESS) -
O presidente da Xunta, Alberto Núñez Feijóo, defendeu que os últimos datos da Enquisa de Poboación Activa (EPA) son "moi positivos mírese como mírese", é dicir, en relación "con outros trimestres, coa baixada do paro, coa ocupación ou coa media das autonomías", pero mantén o desemprego como "o principal problema" da comunidade.
En concreto, o paro descendeu en 26.100 persoas en Galicia no terceiro trimestre do ano respecto aos tres meses anterior, ata situarse en 258.300 desempregados, de forma que baixa un 9,17 por cento e a taxa queda no 20,25 por cento.
Son datos da Enquisa de Poboación Activa (EPA) publicados este xoves polo Instituto Nacional de Estatística (INE), nos que tamén queda patente que, en comparación co mesmo trimestre do ano pasado, o descenso do paro en Galicia é de 2,1 puntos.
Preguntado ao respecto, Núñez Feijóo destacou que os datos son "moi positivos", xa que se constata a "maior baixada" nun terceiro trimestre dende o ano 2005.
"Temos taxas positivas tanto intertrimestrais como interanuais e volvemos mellorar o noso diferencial co resto de España", engadiu, antes de matizar que, en calquera caso, a comunidade mantén máis de 200.000 persoas apuntadas ás listas do paro, polo que "segue sendo o principal problema" da comunidade.
"Malia que a EPA concrete que baixamos o paro en máis de 26.000 persoas e que esta baixada está por enriba da media de España, queda moito traballo por facer e moita tarefa por desenvolver", resolveu.
