Nega que o arquivo da denuncia da CIG polas preferentes sexa un "varapao" ao haber "posibilidade" de reproducila nun xulgado galego
SANTIAGO DE COMPOSTELA, 19 Oct. (EUROPA PRESS) -
O fiscal superior de Galicia, Carlos Varela, espera que non se anule a Operación Pokémon, que instrúe a titular do Xulgado de Instrución Número 1 de Lugo, Piar de Lara, porque hai un "inxente traballo realizado".
"Eu espero que poidamos levalo a xuízo", destacou Varela, xusto antes de facer fincapé, nunha entrevista en Radio Galega recollida por Europa Press, en que "interesa" facer os procesos coa "estratexia axeitada" para "evitar" que se convertan en "megaprocesos ingobernables".
De feito, cualificou á Operación Pokémon como un "megaproceso" onde hai "moitas persoas imputadas" e onde "se acumulan moitas cuestións". "O megaproceso o que fai é caricaturizar o proceso penal polo tempo que demora e a ineficacia que produce", asegurou.
Nesta liña, e preguntado por se é "mellorable" a instrución da Pokémon, o fiscal superior de Galicia puntualizou que "todas as instrucións son mellorables". En concreto, precisou que isto é así "dende a perspectiva de establecer unha nova forma organizativa para abordar este tipo de procesos, grandes procesos, procesos relacionados coa delincuencia complexa, coa criminalidade económico-financeira relacionada con prácticas de corrupción".
Por iso, apostou por un "órgano especializado" para a súa instrución, do "mesmo xeito" como funciona a "Audiencia Nacional" e a "Fiscalía anticorrupción". Deste modo, optou por unha "Fiscalía especializada" en Galicia, "un moderno departamento de investigación e acción penal constituído por fiscais especialistas en materia de delitos complexos e con recursos policiais e recursos da administración". "Fundamentalmente da Axencia Tributaria", matizou.
"TEN QUE FACELA FINITA"
Preguntado por se a Operación Pokémon "non albisca final", Carlos Varela resolveu que a xustiza "ten que facela finita", demostrar "se houbo irregularidades", ver se estas teñen "encaixe penal" e, a continuación, "actuar".
"Isto debe facerse no mellor espazo de tempo posible", indicou o fiscal superior de Galicia, xusto antes de admitir que "quizais, neste momento, non estamos a cumprir con esa regra".
A liña seguida, e cuestionado por se o "dereito de defensa dos procesados" non a vai afectado pola "duración" dos procesos, Varela respondeu que si, pero sinalou que o Tribunal Europeo de Dereitos Humanos e o Tribunal Supremo teñen "unha tradución en termos de beneficio para os imputados" en caso de que os procesos "duren demasiado".
Desta forma, subliñou que "moitas veces" as penas de prisión "acaban convertidas en penas de multa". "Isto hai que evitalo", sentenciou o fiscal superior de Galicia, xusto antes de destacar que "cando estamos diante dun núcleo duro corrupto hai que levalo canto antes a xuízo".
Tamén abordou Carlos Varela o segredo de sumario tras ser preguntado por se este se utiliza de "forma indiscriminada". A este respecto, asegurou que, no caso de que se abusase del, "seguro que se vai facer valer esta cuestión".
NEGA QUE SEXA UN "VARAPAO"
O fiscal superior de Galicia negou que o arquivo da denuncia da CIG polas preferentes sexa un "varapalo" ao existir a "posibilidade" de reproducila nun xulgado galego.
"O argumento que eu coñezo, o que deu a Audiencia Nacional, é que non é competente nesta materia. Polo tanto, habería a posibilidade de reproducir esta cuestión no ámbito territorial galego, nun xulgado de Galicia," ha asegurado, "xusto antes de indicar que isto non quere dicir que unha vez sexa formulado aquí isto teña que traducirse nunha figura como é a estafa".
De tódolos xeitos, precisou que se "pode conseguir o pronunciamento dun órgano xudicial para ver o encaixe penal das participacións preferentes".
MÉNDEZ
Preguntado por se a Fiscalía cre que hai que chamar a declarar a José Luis Méndez, quen foi director xeral de Caixa Galicia, tras a denuncia da CIG sobre supostas vendas irregulares de inmobles á súa muller, Varela sinalou que, en caso de que "se abrise procedemento penal", esa sería unha "decisión" que tería que ser tomada por quen o instruíse.
De tódolos xeitos, destacou que, "probablemente e visto dende fóra", "parece que si sería lóxico que fose chamado a declarar".
"CASOS ESTRELA"
Carlos Varela considera que hai "casos estrela" en Galicia que "chaman moito a atención da prensa", polo que "o xuíz que os leva se sente proxectado a través dos medios de comunicación". "E moitas veces atópase cómodo nesa posición", puntualizou Varela.
De feito, o fiscal xefe de Galicia confesou que a el non lle gustaría ser un xuíz deste tipo, que se sentiría "incómodo".
Así mesmo, o fiscal xefe de Galicia, que opta a un novo mandato, indicou que se tomarán "medidas" para que o xuízo polo asasinato de Asunta non se converta nun "circo mediático".
