Cae esta taxa relativa aos ingresos, pero soben a carencia material severa e persoas que viven en fogares con baixa intensidade no traballo
SANTIAGO DE COMPOSTELA, 26 May. (EUROPA PRESS) -
A taxa de risco de pobreza baixou nun ano en Galicia 1,8 puntos e situouse no 15,4% en 2014, segundo recolle a enquisa de condicións de vida que publica este martes o Instituto Nacional de Estatística (INE), realizada na primavera do pasado ano e que ofrece información sobre os ingresos medios dos fogares durante o ano 2013.
En concreto, o ingreso medio anual neto por persoa na comunidade galega alcanzou ese ano (2013) os 10.235 euros, o que supón un incremento de case o 1,3% en relación co ano anterior, pero representa unha cantidade un 1,5% inferior á do total estatal (10.391 euros).
Así, malia situarse no cuarto lugar pola cola en risco de pobreza por ingresos (a media das comunidades autónomas situouse no 22,2%), Galicia rexistrou o terceiro maior dato en canto a porcentaxe de fogares que pasan "moita dificultade" para chegar co fin de mes, do 20,8% (fronte ao 16,1% da media).
A taxa de risco de pobreza --que se corresponde coa porcentaxe de poboación por debaixo do umbral de risco de pobreza e é polo tanto un indicador relativo que mide desigualdade e non pobreza absoluta, senón cántas persoas teñen ingresos baixos en relación ao conxunto da poboación-- solo foi menor na enquisa de condicións de vida de 2014 para os casos de País Vasco (10,2%), Navarra (11,9%) e Madrid (14,7%), mentres outras comunidades como Extremadura, Andalucía e Murcia superaron o 30%.
Se a comparativa se fai con valores de 2009, cando a taxa de risco de pobreza estaba no 20,6% na comunidade autónoma galega, agora é 5,2 puntos menor.
RISCO DE POBREZA OU EXCLUSIÓN SOCIAL
A estatística do INE recolle, ademais, o indicador 'Arope' de risco de pobreza ou exclusión social, que é unha agregada que combina tres conceptos: o citado risco de pobreza, a carencia material e a baixa intensidade no emprego.
En este apartado, a taxa de risco de pobreza ou exclusión social para o conxunto estatal situouse no 29,2% en 2014 e na comunidade galega máis de cinco puntos por debaixo, no 23,8%, o que representa unha caída en medio punto en comparación co exercicio anterior (cando ascendía ao 24,3%, próximo ao 24,6% de 2009).
Pola súa banda, o indicador de carencia material severa subiu case un punto, do 4,6% en 2013 ao 5,5% o ano pasado, pero segue por debaixo da media estatal, no 7,1% en 2014.
Por último, aumenta tamén case un punto (0,8) o índice relativo a persoas vivindo en fogares "con baixa intensidade no traballo", que pasou do 14,1% ao 14,9%, pero non chega ao 17,1% do conxunto das comunidades autónomas.
DIFICULTADES ECONÓMICAS DOS FOGARES
O listado de dificultades económicas dos fogares desta enquisa de condicións de vida reflexa que un 55,1% dos galegos consultados non pode permitirse ir de vacacións fose de casa polo menos unha semana ao ano.
Non teñen capacidade para afrontar gastos imprevistos un 38,6% dos preguntados, mentres que o 7,6% recoñecen atrasos nos pagamentos relacionados coa vivenda principal e o 20,8% mencionado experimentan "moita dificultade" para chegar co fin de mes.
POBREZA INFANTIL
A estatística recolle que o 35,4% dos menores de 16 anos que residen en España se atopan en risco de pobreza ou exclusión, unha taxa que se incrementou un 3,5 por cento en 2014 e que leva tres anos á alza, pero que non se ofrece analizada por comunidades.
Precisamente por isto, a Xunta realizou no seu día o seu propio estudio sobre pobreza infantil, que presentou o pasado xullo e fixa a taxa 'Arope' --o principal indicador utilizado no ámbito europeo-- no 26,02% para familias con nenos en 2012, fronte ao 23,22 de 2011 (2,8 puntos máis).
