As lapas chegaron a 200 metros de casas de Moás e San Xés, en Paderne, e os municipios de Cartelle, Vilardevós e Coles tiveron varios conatos
OURENSE, 23 Ago. (EUROPA PRESS) -
Un incendio que quedou controlado nos montes de Paderne de Allariz, durante a noite pasada, volveu activarse e as súas lapas chegaron a 200 metros das vivendas de Moás e San Xés, sen achegarse máis debido a que ambos os dous contan cunha franxa de parcelas limpas de vexetación, segundo detallou a Europa Press o alcalde, José Manuel Fernández Gómez.
O lume comezou a última hora do venres preto de Moás, e tras a intervención dos medios de extinción, quedou controlado, pero reactivouse e ás 15,25 foi rexistrado pola vixilancia forestal da Xunta de Galicia.
Fontes da Consellería de Medio Rural confirmaron a Europa Press que na extinción do lume traballan seis avionetas de carga en terra (das bases de Antela e Beariz, en Ourense) e unha de coordinaciòn, ademais de dous helicóptero, dous axentes, sete brigadas (incluídas as helitransportadas e a da mancomunidade) e unha pa bulldozer.
O alcalde atopaba fóra do municipio ao rexistrarse o incendio, pero desprazouse ata os pobos afectados. Recordou que Paderne sufriu en 2013 as lapas dunha forma intensa, pois en setembro se declarou durante unhas horas a alerta de nivel 1 ao resultar afectada polas lapas vivendas en obras e patios de casas.
"Non me cabe dúbida de que este lume de San Xés é tamén intencionado pois comezou" nunha zona de acceso difícil á que hai que ir adrede" agregou. Segundo Fernández Gómez, as lapas quedaron baixo control arredor das 18,30 aínda que non hai notificación oficial desta circunstancia.
VILARDEVÓS REPITE
Por outra banda, o municipio de Vilardevós tamén segue sumando lumes, despois de que o día 21 de agosto se queimasen 14 hectáreas dos montes do pobo de Terroso, tras comezar en "catro ou cinco puntos diferentes", segundo explicou o alcalde, Manuel Cardoso, a Europa Press.
O rexistrado este sábado --día 23-- "comezou a pouca distancia do anterior", segundo Cardoso, ás 15,00 horas pero quedou extinguido dúas horas despois. Entre os medios de extinción atopáronse as dúas brigadas munipales.
Tamén o municipio de Cartelle rexistrou alertas por lume, unha delas na parroquia de Ás Marabillas arredor das 15,10 horas e quedou controlado ás 15,50, segundo fontes da consellería de Medio Rural. Varias alertas por lume déronse nas últimas 16 horas nos municipios de Coles e A Peroxa.
