A coordinadora reprocha aos partidos que apoian a confluencia que a unidade non se fai "por separado" ante a diversidade de actos
SANTIAGO DE COMPOSTELA, 17 Jul. (EUROPA PRESS) -
En Marea celebrará o próximo 25 de xullo o Día da Patria cunha xornada de lecer --comida, música e humor-- que conta cun amplo programa no que, entre outras actividades, inclúese un "mitin cómico sobre a confluencia". "Imos tratar de rirnos de nós mesmos un intre tamén, que fai moita falta, relativizarnos a nós mesmos, as nosas ideas e tomarnos as cousas con filosofía", sinalou o membro da coordinadora Gonzalo Rodríguez.
Os actos para a xornada festiva baixo a lema 'A Galicia de todas', que se celebrará por segundo ano consecutivo no parque de Vista Alegre de Compostela, comezarán a partir das 13,30 cunha sesión vermú con concerto Najla Shami e ás 14,55 haberá un saúdo do portavoz nacional, Luís Villares.
O día incluirá espectáculo infantil de Peter Punk, porque "hai que mirar ao futuro" e incluír aos máis pequenos, e continuará ás 17,45 horas co mitin cómico sobre a confluencia. Ás 18,15 horas haberá poesía e rap e ás 19,15 acabará a xornada "cantando e bailando".
En Marea tamén instalará a árbore dos desexos, para que todos aqueles que se acheguen poidan deixar escritas as súas peticións. "Galicia, sobre todo, ten que mirar ao futuro", subliñou o membro da coordinadora encargado de presentar o evento.
Gonzalo Rodríguez explicou que En Marea quere un Día da Patria "acolledora, diversa e de todas, un día de celebración da diversidasde e da inclusividade".
"CONFLUÍR POR SEPARADO"
E, preguntado polo feito de que Anova teña previsto facer o seu propio acto (como o pasado ano), lembrou que xa en 2017 a formación da confluencia anunciou que cada 25 de xullo faría o seu acto e lamentou, en xeral, que ultimamente se "observan" moitos "oxímoros": "Confluír por separado".
Gonzalo Rodríguez defendeu que a coordinadora de En Marea segue tendendo a man ao "diálogo e a unidade" e apostou por "superar o minifundismo", o cal se pode "materializar" no Consello, grupos de traballo ou en calquera "foro de debate". "Debería ser o óptimo", dixo, preguntado se sería conveniente que todos os dirixentes de En Marea estivesen reunidos nun único acto o 25 de xullo.
Esta mensaxe de necesidade de unidade e dialogar, fronte ás divisións internas, tamén foi lanzado en referencia a outros dirixentes políticos que forman parte de En Marea e que non participan activamente da vida interna da formación rupturista.
Así, á mantenta da celebración esta fin de semana da escola de verán de En Marea, chamada 'A Unitaria' --en homenaxe á escola unitaria, fundamentalmente no rural--, lamentou que Carmen Santos (secretaria xeral de Podemos Galicia) e o deputado Antón Gómez-Reino (tamén inscrito de Podemos) non haxan sequera "contestado" á invitación que lles fixo a formación para participar no foro.
ESCOLA DE VERÁN PROGRAMA
A escola de verán, que si contará co referente nacionalista Xosé Manuel Beiras (Antón Sánchez, portavoz de Anova, declinou formalmente acudir), celebrarase esta fin de semana 21 e 22 de xullo no Café Moderno de Pontevedra e incluirá dúas visitas culturais: unha ao Museo de Pontevedra e outra a Lourizán, que tamén será reivindicativa co medio ambiente (nos terreos está situada Ence).
Así, o programa inclúe conferencias sobre como conciliar activismo e presenza institucional (con Joana Mortágua, do Bloco de Esquerdas, e Beiras), sobre urbanismo (Xosé Allegue, Pepe Constenla e Emma López Bahut) e o dereito á esperanza (María Xosé Porteiro, Marilar Aleixandre, Tereixa Novo e Teresa Cunha).
Xa o domingo, como relatores de distintas charlas estarán a eurodeputada Lídia Senra e Gonzalo Roríguez e Carmen Freire (para abordar que é o desenvolvemento). Tamén se tratará a cita electoral das municipais, as europeas e o portavoz nacional, Luís Villares, ofrecerá unha charla baixo o título 'Os límites do desexo' antes de pechar o acto.
