SANTIAGO DE COMPOSTELA, 23 Sep. (EUROPA PRESS) -
A presenza dunha densa néboa dende a xornada deste luns volveu obrigar ao peche da autovía do Cantábrico entre os municipios de Abadín e Mondoñedo (Lugo).
Fontes da Dirección Xeral de Tráfico (DGT) en Galicia informaron a Europa Press de que este novo corte provisional de tráfico se prolonga dende as 20,00 horas do luns, aproximadamente.
O momento no que será posible a reapertura depende da evolución da néboa, que de momento segue sendo "espesa", segundo as mesmas fontes.
No tramo agora pechado produciuse un accidente múltiple o pasado mes de xullo que provocou a morte dunha persoa e lesións para outras 50.
Dende entón, o Ministerio de Fomento, a quen corresponde a titularidade da vía, asegura planificar e estar a implantar medidas de reforzo da seguridade.
