A súa defensa recorre a expulsión ao entender que a pena quedou extinguida cos cinco anos nos que xa estivo en prisión
PONTEVEDRA, 20 Nov. (EUROPA PRESS) -
A Sección Cuarta da Audiencia de Pontevedra ditou unha providencia para a posta en liberdade de Hai Jie Zhang, xulgado polo asasinato de dúas mulleres chinesas na cidade de Pontevedra en abril de 2009, tras ser absolvido. Non obstante, para o individuo, ordenouse a súa expulsión do país.
A decisión do tribunal pontevedrés de posta en liberdade obedece ao mandato do Tribunal Superior de Xustiza de Galicia (TSXG), que emitiu este mércores día 19 un auto ordenando a súa inmediata excarceración.
Segundo informou o TSXG, aínda non se ditou a sentenza, pero enténdese que esta será absolutoria e revogará a condena de 14 anos de prisión ditada pola Audiencia Provincial de Pontevedra baseándose no veredicto de culpabilidade emitido por un xurado popular que entendeu que Hai Jie Zhang fora o autor de tan só unha das dúas mortes das mulleres asiáticas. O procesado por estes feitos levaba case de cinco anos en prisión.
A avogada Patricia Martín, que defende os intereses deste cidadán chinés, explicou xa saíu de prisión, pero non se atopa en liberdade senón que está nun Centro de Internamento de Inmigrantes situado en Madrid.
A letrada informou de que o auto do TSXG inclúe tamén unha orde de expulsión de territorio nacional para devolvelo a China en cumprimento dunha pena anterior de 21 meses de prisión e multa de 4 meses (que non pagou) por un delito de estafa cometido en Murcia, que se conmutaba pola súa expulsión de territorio nacional.
"CHORABA DE FRUSTRACIÓN"
Patricia Martín recorreu esta decisión de expulsión ao entender que a devandita pena quedou extinguida con estes cinco anos nos que estivo en prisión polos feitos dos que resultou absolvido, polo que espera que a Audiencia revogue esta orde de expulsión.
A avogada pontevedresa Patricia Martín indicou, ademais, que ante todos estes feitos o seu cliente "choraba de frustración". O prazo para tomar unha decisión sobre a súa posta en liberdade é de 72 horas.
