Foto: CEDIDA
av2" class="NormalTextoNoticia" itemprop="articleBody">
Caen unha décima respecto a agosto, malia o incremento do valor da enerxía (+0,4%)
SANTIAGO DE COMPOSTELA, 24 Oct. (EUROPA PRESS) -
Os prezos industriais descenderon un 0,9% en setembro en Galicia respecto ao mesmo mes do ano anterior, de forma que acumulan a súa décimo cuarta baixada consecutiva, de acordo cos datos que publica este venres o Instituto Nacional de Estatística (INE).
En relación con agosto, os prezos caeron unha décima na comunidade, debido á redución dos bens de consumo (mantivéronse sen variación os duradeiros pero retrocederon tres décimas os non duradeiros) e á dos bens intermedios (-0,2%).
Pola contra, aumentaron catro décimas en taxa intermensual os prezos da enerxía, e tampouco experimentaron cambio os bens de equipo. No que vai de ano, o índice global tamén se mantén sen variación.
En canto á evolución anual, os prezos industriais da comunidade víronse empurrados á baixa pola diminución da enerxía (-2,8%), dos bens intermedios (-0,7%) e os bens de consumo (-0,5%, malia o aumento de catro décimas dos de consumo duradeiro). Os bens de equipo non variaron.
Nos meses anteriores, Galicia rexistrou taxas interanuais negativas dende xullo de 2013, cando os prezos da industria subiron un 0,3%. Así, os retrocesos foron do -1, -1,6; -1,8; -1,4 e -0,4% nos seguintes meses do pasado ano e do -1,7; -2,8; -2,2; -1,1; -1,3; -0,7; -1,3 e -1,3% no que vai de 2014.
DATOS ESTATAIS
No conxunto do Estado, os prezos industriais subiron un 0,5% en setembro respecto ao mes anterior e descenderon un 0,3% en taxa interanual, tres décimas por enriba do rexistro de agosto ( -0,6%).
Con este recorte interanual no noveno mes do ano, os prezos industriais encadean tres meses de descensos interanuais despois de que en xuño lograsen a súa primeira taxa positiva en seis meses.
A evolución interanual que experimentaron os prezos industriais en setembro debeuse principalmente á enerxía, que situou a súa taxa anual no 0,0%, un punto máis que en agosto, polo encarecemento da produción, transporte e distribución de enerxía eléctrica.
Tamén contribuíron ao avance interanual dos prezos industriais os bens intermedios, que presentaron unha taxa interanual do -0,7%, dúas décimas máis que en agosto, debido ao repunte de prezos da produción de metais preciosos, que rexistrou a súa taxa anual máis alta dende setembro 2011, e á baixada dos prezos da fabricación de produtos para a alimentación animal.
Pola contra, en setembro reduciuse dúas décimas a taxa interanual dos bens de consumo non duradeiro, ata o -0,6%, pola evolución dos prezos do procesado e conservación de carne e a fabricación de produtos lácteos.
En termos mensuais (setembro sobre agosto), os prezos industriais subiron un 0,5%, fronte ao descenso mensual do 0,1% experimentado en agosto e a alza do 0,2% dun ano antes.
NOVE COMUNIDADES EN NEGATIVO
A peche de setembro, sete comunidades presentaban unha taxa interanual de prezos industriais positiva, con Baleares (6,7%), Canarias (3,9%) e Asturias (3,4%) á cabeza, mentres que sete rexións rexistraban taxas anuais negativas, principalmente Andalucía (-1,8%) e Castilla-La Mancha (-1,9%). Extremadura, pola súa banda, situou a súa taxa interanual no 0,0%.
En setembro, a taxa anual dos prezos industriais aumentou en trece comunidades autónomas, especialmente en Baleares, cun avance de 2,8 puntos, ata o 6,7%.
