SANTIAGO DE COMPOSTELA, 24 Ene. (EUROPA PRESS) -
O ferido grave no accidente rexistrado na tarde do martes na empresa Finsa no municipio coruñés de Padrón, D.B.M., de 38 anos, permanece ingresado na Unidade de Queimados do Complexo Hospitalario Universitario A Coruña (Chuac) con queimaduras de terceiro grao.
Segundo informaron a Europa Press fontes hospitalarias, o paciente presenta queimaduras de terceiro grao no dez por cento da superficie corporal. Principalmente ten afectadas a cara, pescozo e un pouco unha perna.
O ferido atópase hospitalizado na Unidade de Queimados do Chuac con "prognóstico grave", engadiron as mesmas fontes hospitalarias.
FEITOS
Os feridos no accidente rexistrado na fábrica de Finsa con sede no municipio de Padrón foron a oito, segundo datos da empresa. Deles, sete rexistraron queimaduras leves e o grave foi derivado á Unidade de Queimados do Chuac.
Concretamente, os traballadores, que pertencen a unha empresa externa e que estaban contratados para realizar unha acción de mantemento, atopábanse na zona de grumos da fábrica, na que traballan uns 300 empregados.
O incendio produciuse cando se realizaban traballos de illamento nunhas tubaxes e, segundo os servizos de emerxencias, unha delas rebentou, o que provocou un lume que foi sufocado polos propios traballadores.
Até a zona desprazouse o helicóptero medicalizado do 061 con base en Santiago, que evacuou ao Chuac ao ferido grave. A maiores, mobilizáronse varias ambulancias, que trasladaron a catro persoas lesionadas, en estado leve. En concreto, dúas de 51 e 53 anos foron levadas ao Hospital Clínico de Santiago, mentres que outras dúas, de 26 e 28 anos, foron derivadas ao hospital HM Rosaleda.
