Medio Rural presenta un Pladiga provisional no Consello Forestal aberto a achegas durante 15 días
SANTIAGO DE COMPOSTELA, 29 Abr. (EUROPA PRESS) -
O operativo contra incendios forestais da campaña de alto risco en Galicia deste verán estará composto de novo por 5.767 efectivos da Xunta, as mesmas persoas que en 2015, que se reforzarán con persoal do Ministerio, o Exército e dos Corpos e Forzas de Seguridade do Estado, ata completar un operativo dunhas 7.000 persoas. Tamén se manteñen os medios materiais, uns 30 aéreos e 360 motobombas.
Así figura no Plan de prevención e defensa contra os incendios forestais en Galicia (Pladiga) provisional para 2016 que o Goberno galego presentou ao consello Forestal celebrado este venres. O texto está aberto a modificacións e conta cun prazo de 15 días para presentar achegas.
Segundo informa o Goberno galego, unha das principais novidades para este ano é que se amplían a tres anos a duración dos convenios de Medio Rural cos concellos para a prevención contra o lume, así como a creación e regulación da figura das agrupacións de defensa contra incendios forestais.
Tamén se fará unha análise de 79 parroquias de alta actividade incendiaria -nas que a Xunta extrema a vixilancia dende 2014- para ver a relación entre usos do territorio e os lumes para concretar medida a implantar.
Ademais apostarase pola renovación de equipos (85 camións de extinción novos dende 2013) e apostará por obras de adecuación para a homologación das bases de medios aéreos. A isto únese un novo sistema de comunicación integrado na rede galega de emerxencias, xunto a un programa informático de xestión integral de incendios en tempo real.
Todo iso co fin de facer descender este ano o tamaño dos incendios e a superficie afectada, tanto arbolada como rasa, en Galicia.
