SANTIAGO DE COMPOSTELA, 27 Ene. (EUROPA PRESS) -
O voceiro parlamentario do BNG, Francisco Jorquera, acusou este martes de "fume" a "retahíla de propostas" do presidente da Xunta, Alberto Núñez Feijóo, contra a corrupción, pois, ao seu xuízo, só buscan "tapar" e "xustificar" o que non está a facer.
Exemplificou esta afirmación o dirixente nacionalista, na súa quenda de réplica ante o pleno do Parlamento, no anuncio do mandatario dunha nova lei de transparencia "para ocultar que non respecta a vixente".
"De vostede non espera unha mala palabra, pero tampouco unha boa obra", remachou, e incidiu en que a loita contra a corrupción "non se predica" senón que "se practica". "É necesario actuar con contundencia e vostede non o fai", mantivo.
Neste punto, censurou que Feijóo prefire "mirar para outro lado lado á hora de render contas" sobre a "interminable lista de imputados" do seu partido ou sobre as súas "amizades perigosas" co narcotraficante Marcial dourado ou o suposto conseguidor da Operación Zeta, o empresario madrileño Pachi Lucas.
"Só lle faltou emular a Rajoy e dicir que 'xa se tal", ironizou Jorquera, e proseguiu coa equiparación ao comparar a dimisión do presidente de Sogama, Luis Lamas, a semana pasada, por adxudicar un contrato a un bufete do que era socio, coa da exministra Ana Mato en vésperas dun pleno sobre medidas anticorrupción.
"PROPOSTAS CONCRETAS"
Crítico tamén con que o presidente non facilitase aos grupos parlamentarios as súas medidas para poder debatelas en profundidade, coma se os deputados fosen "invitados de pedra" á comparecencia, o deputado do Bloque presentou as súas "propostas concretas" para "unha loita máis eficaz contra a corrupción".
Así, defendeu a necesidade de eliminar as denominadas "portas xiratorias", restrinxindo a incorporación a empresas privadas de altos cargos públicos; de reclamar o endurecemento das penas para delitos de corrupción, que deberían resarcirse co patrimonio persoal; e que se eliminen as prácticas de contratación pública sen publicidade.
Tamén apostou por devolver ao sistema público aqueles servizos privatizados ou de xestión indirecta, por reducir os gastos de publicidade, por mellorar os medios da Xustiza para combater a corrupción e por "garantir a independencia" dos medios de comunicación públicos.
