SANTIAGO DE COMPOSTELA, 14 Nov. (EUROPA PRESS) -
A líder do Bloque Nacionalista Galego, Ana Pontón, acusou o presidente da Xunta, Alberto Núñez Feijóo, de manter a todos os seus conselleiros co obxectivo de "ascender a algún" de cara ás futuras eleccións municipais e non porque pense que o fan ben" e que "non "ten nada que mellorar".
A dirixente nacionalista pronunciouse deste modo nunha rolda de prensa ofrecida este luns, na que criticou tamén o "inmobilismo" do titular do Goberno galego ao argumentar que o seu "triunfalismo é inútil" para mellorar a vida dos galegos. "Feijóo desaproveitou a oportunidade que lle deron os galegos para facer algo diferente, algo mellor para o conxunto do país", considerou.
Por todo iso, acusou ao tamén presidente do PPdeG de configurar o seu novo goberno "non en clave do que lle interesa a Galicia" senón "en clave do que se interesa neste momento ao PP".
Así, sinalou que "ademais de querer seguir utilizando as institucións públicas e aos conselleiros como lanzadeira para as próximas municipais", tampouco "quere dar pasos ou interpretacións a respecto da súa sucesión no partido".
"MOITO QUE MELLORAR"
Fronte a iso, Pontón deixou claro o BNG "non coincide coa conformación do goberno nin con esa valoración autocompracente". "Creo que en todas as áreas habería moito que mellorar", subliñou para citar "cuestións estratéxicas para o futuro" como "o ámbito do desenvolvemento económico" ou "a innovación".
"Durante estes últimos anos Galicia o único que fixo foi perder oportunidades neste ámbito, a necesidade dunha nova política sanitaria, educativa, social,...", manifestou para criticar que Feijóo "peche a porta ás esperanzas a todo o mundo que quería algo diferente".
