SANTIAGO DE COMPOSTELA, 25 Feb. (EUROPA PRESS) -
Portos de Galicia incrementou a súa facturación nun 9,3% interanual no primeiro mes de 2017, segundo recolle o informe de xestión do organismo portuario, que inclúe o balance de actividade ata o 31 de xaneiro e sitúa en dous millóns de euros a facturación alcanzada o pasado mes.
Segundo informou a Xunta, en relación ao tráfico de mercadorías, o volume de carga e descarga nos 122 portos de titularidade autonómica situouse no primeiro mes do ano en 121.500 toneladas.
En concreto, os movementos de mercadorías mais importantes corresponderon aos portos de Ribadeo, con 37.500 toneladas; Brens (Cee), con 31.100 toneladas; e Cariño, con 28.835 toneladas.
Así mesmo, destacaron os movementos rexistrados nos peiraos da Mariña lucense e, concretamente, no de Viveiro-Celeiro, con 12.530 toneladas, e Burela, con 9.400.
Respecto á descarga de pesca fresca, nos peiraos dependentes da Xunta de Galicia descargáronse ata o 31 de xaneiro preto de 7.000 toneladas de peixe, un 11% máis que no mesmo período de 2016.
Esta cifra supuxo un importe total da venda en lonxa de 23 millóns de euros. Os peiraos con maior volume de descarga de pesca fresca foron Ribeira, con 1.800 toneladas; Burela, con 1.500, e Celeiro, con 1.300 toneladas.
