"Respecta" as vítimas que non desexen estar na entrega de medallas e "agradece profundamente" a presenza das que acudan
SANTIAGO DE COMPOSTELA, 24 Jul. (EUROPA PRESS) -
O PPdeG gardou este xoves un minuto de silencio en todas as súas sedes en recordo da traxedia ferroviaria de Angrois que se produciu o 24 de xullo de 2013. Ata a sede autonómica, entre outros dirixentes, desprazouse o seu secretario xeral e vicepresidente, Alfonso Rueda, quen tras o xesto de homenaxe volveu erixir o pobo galego en "exemplo de solidariedade e servizo".
En declaracións aos medios tras o minuto de silencio, Rueda rememorou o accidente do Alvia no que faleceron 79 persoas e decenas resultaron feridas, pero tamén a actitude coa que os cidadáns da comunidade afrontaron un acontecemento que marcará "para sempre" a véspera do Día de Galicia. O seu foi, defendeu, "un exemplo de solidariedade, de servizo e de saber estar á altura".
"É momento de render homenaxe e sentir un orgullo triste pola forma en que tanta xente mostrou a solidariedade ante unha desgracia", transmitiu o secretario xeral dos populares galegos, nun acto no que participaron o voceiro parlamentario do PPdeG, Pedro Puy; a exvoceiro do partido, Paula Prado; o presidente de Novas Xeracións, Diego Gago; e deputados autonómicos e estatais.
Así, Rueda manifestou a súa intención de homenaxear as vítimas e os seus familiares con este "pequeno recordo" que levaron a cabo diante de todas as sedes do Partido Popular de Galicia un ano despois da traxedia, que "ogallá non se producise, pero por desgracia tivo lugar".
Deste xeito, o secretario xeral deu as grazas, en nome dos populares galegos, ao persoal de emerxencia, persoal sanitario, voluntarios e veciños de Angrois, e remarcou que Galicia soubo "estar á altura".
"RESPECTO" Ás VÍTIMAS
En relación á entrega de Medallas de Ouro de Galicia, máxima distinción que entrega a Xunta e que este ano liga cos colectivos vinculados a Angrois, Rueda afirmou que "respecta" as vítimas que non desexan estar presentes e "agradece profundamente" a presenza de aquelas que entenden que deben acudir.
Ao finalizar as declaracións, un home asomado a unha ventá dende o edificio de sindicatos, berrou "corruptos" os populares galegos, que nese momento abandonaban o acto de homenaxe.
