SANTIAGO DE COMPOSTELA, 23 Sep. (EUROPA PRESS) -
O PSdeG instou á Xunta a combater "sen paliativos e sen ningún tipo de obstáculo" o que asegura que se converteu "na escravitude do século XXI", pola explotación sexual e o tráfico de mulleres.
Coincidindo co día dedicado a conmemorar a loita contra esta lacra, os socialistas, a través dun comunicado, solicitan ás administracións públicas --de forma "especial" ao Goberno galego-- que destinen e incrementen as partidas concretas para a erradicación destas redes de tráfico e explotación sexual.
Segundo aseguran, Galicia "tampouco escapa desta dramática realidade", polo que chama a ser "especialmente contundente" coas medidas que se apliquen para rematar co tráfico e a explotación de mulleres e nenos.
"Debemos afondar na orixe destas mafias e redes para desmantelalas, debemos traballar de forma pertinaz na educación en igualdade e non podemos escatimar esforzos nin recursos para rematar con este negocio totalmente degradante para quen o sofre e para asistir e inserilas, de forma especial no caso dos menores", expón na nota.
Ademais, o PSdeG demanda que se incrementen os protocolos de colaboración con outras institucións e organismos implicados e que, a maiores e dende as competencias do Executivo autonómico, desenvolva medidas e programas integrais de actuación "encamiñados a que as vítimas non só superen o trauma e secuelas físicas e psíquicas xeradas pola súa situación, senón que, ademais, se fagan visibles na sociedade". "Visibles e, sobre todo, libres", subliña.
O día internacional contra a explotación sexual e o tráfico de mulleres, nenas e nenos foi instaurado pola conferencia mundial da coalición contra o tráfico de persoas en coordinación coa conferencia de mulleres que tivo lugar en Dhaka, Bangla Desh, en xaneiro de 1999.
