SANTIAGO DE COMPOSTELA/OURENSE, 4 Sep. (EUROPA PRESS) -
O home detido este venres por axentes da Garda Civil como presunto autor do incendio que calcinou 3.180 hectáreas na localidade de Cualedro (Ourense) quedou en liberdade esta mesma xornada tras pasar a disposición xudicial.
Segundo sinalaron fontes do TSXG, o detido, un veciño de Cualedro de 83 anos que responde ás iniciais G.A.A., pasou a disposición do xulgado mixto número 1 da localidade de Verín, e posteriormente quedou en liberdade pero imputado por un delito de incendio forestal. Así mesmo, a xuíza tomou declaración a catro testemuñas.
O lume iniciouse ás 12.30 horas do pasado día 30 na parroquia de Lucenza, no municipio ourensano de Cualedro, e os traballos de control das lapas estendéronse ata o xoves desta semana, cando quedou extinguido ás 11.20 horas.
Tratouse do primeiro e por agora único grande incendio forestal da campaña de alto risco en Galicia -aqueles que superan as 500 hectáreas calcinadas-, arrasando 3.180 hectáreas, 748 delas arboladas, durante os catro días que permaneceu activo.
As lapas propagáronse con rapidez a tres concellos limítrofes (Xinzo, Trasmiras e Baltar). Na área do incendio localizáronse varios artefactos incendiarios e houbo ata sete focos nun radio de seis quilómetros.
Tamén foi necesario activar a situación 2 por proximidade das lapas ás vivendas, rexistrándose situacións de alto risco en polo menos sete localidades deste municipio. As lapas aproximáronse e devastaron extensións considerables de monte das localidades de Saceda, Pedrosa, Lucenza, Lamalonga, Muimenta, Vileda e o propio Cualedro.
O lume tamén se aproximou a localidades de Xinzo de Limia como Gudín, Novás e Cebreiro, así como ás de Vilardelebres e Serralleira de Trasmiras e outras do municipio de Baltar.
O incendio afectou, ademais, a granxas ou alpendres e dous vehículos motobomba, e obrigou a desaloxar diversas vivendas pola proximidade das lapas.
