A CORUÑA, 2 Sep. (EUROPA PRESS) -
A conselleira do Medio Rural e do Mar, Rosa Quintana, replicou este martes que a administración "non pode facer nada para que un proceso natural" como a aparición de toxina nas rías "non se poña en marcha".
Así o dixo, a preguntas dos xornalistas sobre as demandas de bateeiros como a organización de produtores do Grove (Amegrove) para que se busque unha solución á toxina que afectou o mexillón.
Coincidindo coa súa presenza na inauguración dun seminario sobre 'Pesca Marítima e bioloxía' da Fundación Rendemento Económico Mínimo Sostible e Social, Quintana dixo que as normas que hai para a detección de toxinas "son iguais para todos os países e os niveis mínimos de toxicidade tamén".
"A Xunta o que fai é ter o mellor sistema de control a nivel de todo o mundo", sinalou a conselleira, quen argumentou que "hai poucos anos había moi poucos puntos de mostraxe" nas rías". "Hoxe en día hainos case todos os polígonos", recalcou.
Por outra banda, remarcou que a Administración autonómica traballa "para tratar de minimizar o impacto deste proceso natural" e subliñou que o incremento dos puntos de mostraxe busca "que o impacto sexa menor".
