As denominacións de orixe ourensás rexistraron caídas por culpa das xeadas e granizadas da pasada primavera
SANTIAGO DE COMPOSTELA, 17 Dic. (EUROPA PRESS) -
A campaña da vendima deste ano recolleu en Galicia un total de 61 millóns de quilos de uva, o que supón un aumento do 3 por cento respecto dos datos de 2016, segundo informou a Consellería do Medio Rural este domingo.
Trátase do terceiro mellor dato da década e débese aos grandes resultados da Denominación de Orixe Rías Baixas, que compensan as caídas rexistradas nas denominacións ourensás, penalizadas polas xeadas e as granizadas da pasada primavera.
Así, a vendima de 2017 sitúase un 9,6 por cento por encima da media do último decenio (2008-2017). Os datos de Galicia contrastan cos rexistrados no conxunto estatal, onde a produción caeu un 15 por cento respecto de 2016.
A Xunta destaca a "moi boa oportunidade" que supón a vendima deste ano para o sector vitivinícola galego, xa que a baixada da produción non se limitou ao conxunto de España, senón que se trata dunha tendencia global.
Deste xeito, a previsión de produción mundial apunta a un descenso do 8 por cento, con caídas importantes nos principais países produtores do mundo, como Francia e Italia, onde a produción diminuíu un 19 e un 23 por cento, respectivamente.
CALIDADE DA UVA
En canto á calidade da uva, Medio Rural destaca que "foi moi boa" no cinco denominacións galegas, polo que as previsións dos expertos apuntan a "viños de gran calidade" na colleita de 2017.
A branca predominou na vendima deste ano, con máis de 52 millóns de quilos, un 85 por cento do total de uva cultivada. Por variedades, a albariña representa o 73,5 por cento da produción, reservada para a treixadura e a godello un 8,7 e un 7,7 por cento, respectivamente.
Nas uvas tintas, predominou o cultivo da mencía cun 78,2 por cento sobre o total.
DENOMINACIÓNS
Así as cousas, o D.O. Rías Baixas concentrou o 64,08 por cento do total de uva recollida con máis de 39 millóns de quilos, o que fai de 2017 o terceiro ano consecutivo en que sobe a produción nesta denominación, que acumula un incremento do 32,4 por cento respecto ao valor medio da década.
Ribeiro representa o 15,43 por cento do total (9,4 millóns de quilos), seguida por Ribeira Sacra (8,9 por cento; 5,5 millóns de quilos) e Valdeorras (6,81 por cento; 4,1 millóns).
En último lugar atópase Monterrei, que foi a denominación que máis acusou as inclemencias meteorolóxicas sufridas nesta campaña e onde se recolleron 2,8 millóns de quilos de uvas, o que representa un 4,70 por cento da produción total de Galicia.
Todas estas denominacións de orixe galegas comercializaron en 2016 uns 416.000 hectolitros de viño, cun valor en orixe duns 195 millóns de euros, segundo datos ofrecidos pola Xunta.
