SANTIAGO DE COMPOSTELA, 2 Mar. (EUROPA PRESS) -
O voceiro parlamentario do PPdeG, Pedro Puy, concretou este luns que o recentemente nomeado conselleiro de Educación, Román Rodríguez, efectivizará a súa renuncia ao escano no pleno da semana próxima, de modo que volverá á Cámara galega Jesús Goldar, voceiro popular en Caldas de Reis (Pontevedra).
Xunto con iso, en rolda de prensa, avanzou que a seguinte sesión plenaria tamén acollerá o debate de totalidade do proxecto de Lei do emprego público que prevé destinar 350 millóns de euros ata 2018 para que os funcionarios recuperen a totalidade do seu complemento específico e a paga extraordinaria de Nadal de 2012.
Ademais, destacou que esta norma foi aprobada pola Xunta co obxectivo de "mellorar a profesionalización" da función pública e de regular o persoal directivo na administración. Por exemplo, estipula que as xefaturas de servizo se cubrirán a través de concursos en vez de por libre designación, ao tempo que introduce a "flexibilidade horaria" e a "estabilización" dos equipos.
Finalmente, o voceiro do PPdeG no Pazo do Hórreo indicou que este marco normativo para os 120.000 empregados públicos de Galicia en distintas administracións --local, autonómica, órganos estatutarios, universidade, entes instrumentais da Xunta-- está "aberto" ás achegas da oposición para a "súa mellora" no trámite parlamentario.
