SANTIAGO DE COMPOSTELA, 22 Ene. (EUROPA PRESS) -
O tres centros de Salvamento Marítimo situados en Galicia (Fisterra, Vigo e A Coruña) coordinaron o rescate, asistencia ou busca de 878 persoas durante 2017, practicamente a mesma cifra que o ano anterior.
En concreto, segundo o balance anual de Salvamento Marítimo, o centro de control de Fisterra foi o que coordinou un maior número de operativos, con 507 persoas implicadas. Pola súa banda, o centro de control e salvamento da Coruña auxiliou a 226 persoas e o de Vigo a 145.
Durante o ano 2017 faleceron ou desapareceron en actividades relacionadas co mar en Galicia un total de 34 persoas, informou a entidade.
Delas, 29 estaban implicadas en actividades non relacionadas con embarcacións, como caídas á auga desde a costa, windsurf ou submarinismo. Tres persoas faleceron a consecuencia de incidentes en pesqueiros, unha nun mercante e unha nunha embarcación de recreo.
Do mesmo xeito, ao longo do pasado ano víronse implicados en incidentes marítimos 150 embarcacións de recreo, 113 pesqueiros e 71 buques mercantes. Adicionalmente, o Centro de Coordinación de Salvamento de Fisterra realizou o seguimento de 34.014 buques ao seu paso polo Dispositivo de Separación de Tráfico ao longo do pasado exercicio.
DATOS NACIONAIS
A nivel nacional, Salvamento Marítimo coordinou o rescate, asistencia ou procura de 36.079 persoas (unha media de 99 ao día) ao longo de 2017, o que supón o dobre do ano anterior, debido ao aumento en materia de inmigración irregular.
En 2017 faleceron ou desapareceron 315 persoas. O 49 por cento en intervencións de inmigración irregular; o 41 por cento en actividades non relacionadas con embarcacións; e o 10 por cento en diferentes tipos de embarcacións.
Igualmente, Salvamento Marítimo coordinou a procura de 1.211 pateras e rescatou a 18.937 persoas (un 182 por cento máis respecto de 2016), aínda que 153 persoas máis faleceron ou desapareceron.
En 2017, víronse implicados en incidentes marítimos 2.470 embarcacións de recreo, 490 pesqueiros e 381 buques mercantes.
Por outra banda, o número total de buques controlados polos centros de Salvamento Marítimo nos Dispositivos de Separación de Tráfico de Finisterre, Tarifa, Cabo de Gata, Canarias Oriental e Occidental ascendeu a 145.189 buques.
