SANTIAGO DE COMPOSTELA, 17 Abr. (EUROPA PRESS) -
A tripulación do arrastreiro Mar Nosso, afundido este xoves fronte ás costas de Asturias, está composta por cinco mariñeiros galegos e sete portugueses
Así o apuntaron fontes da asociación de armadores de Marín, onde o buque de bandeira portuguesa ten o seu porto base, que precisaron tamén que se trata dun arrastreiro de 32 metros de eslora e máis de 180 toneladas. O buque saíra esta mañá do porto de Avilés.
O barco 'Mar da Galega', que se atopaba na zona, foi o que realizou a chamada de alerta a Salvamento Marítimo pasadas as 13.00 horas, indicando que un buque atopaba "quilla ao sol" e, posteriormente, puido rescatar con vida sete dos 12 tripulantes do buque afundido, segundo información de Salvamento Marítimo. Por outra banda, o pesqueiro Kika, tamén na zona, recuperou dous cadáveres da auga.
BUSCA
Dende o Centro de Salvamento Marítimo de Gijón estase a coordinar o operativo de busca para tratar de localizar os tres mariñeiros do Mar Nosso que permanecen desaparecidos.
Nos labores participan o helicóptero da Xunta de Galicia Pesca 2, a embarcación de Salvamento Marítimo 'Salvamar Capella' e varios pesqueiros.
