Demandan unha normativa "específica" para combater a violencia de xénero no traballo con mecanismos de prevención
SANTIAGO DE COMPOSTELA, 24 Nov. (EUROPA PRESS) -
UGT e Comisións Obreiras apelaron á cidadanía para que se sume ás concentracións convocadas en todas as cidades galegas o mércores, Día Internacional para a Eliminación da Violencia contra as Mulleres. Nesta ocasión, ademais, ambos os dous sindicatos poñen o foco no acoso laboral, dada a "invisibilidade" deste problema.
En rolda de prensa, as secretarias de Igualdade de UGT e CC.OO. en Galicia, Mónica Rodríguez e Mabel Pérez, chamaron a atención sobre esta "grave violación dos dereitos humanos".
En concreto, a sindicalista de UGT referiu que un estudio sinala que "entre o 40 e o 50 por cento" das mulleres sufriron, na Unión Europea, "insinuacións sexuais non desexadas, contacto físico ou outras formas de acoso sexual no traballo". Malia iso, "segue sin haber unha norma específica" que aborde esta cuestión, criticou.
Dito isto, demandou unha lei internacional enfocada cara á prevención e que "apoie" as vítimas garantíndolles dereitos laborais e de seguridade social.
Ao respecto, Mónica Rodríguez reflexionou sobre que, se ben as leis contra a violencia machista a nivel estatal e galego recollen "algunhas garantías", o seu contido é "susceptible de melloras legais" ante as "carencias" que se foron detectando e as "dificultades" na súa aplicación práctica.
SEN DATOS
Pola súa parte, a dirixente de CC.OO. lamentou que "non hai datos" oficiais sobre o acoso sexual ou o acoso ás mulleres no traballo, de modo que esta problemática está "na situación de falta de visibilidade" que tiña a violencia de xénero "hai 30 anos.
Por iso, resaltou a necesidade de que se "visibilice", toda vez que as estimacións do Instituto da Muller indican que un 15 por cento das mulleres ocupadas en España sofren acoso sexual ou por razón de sexo no seu traballo. "É un dato tremendo", remarcou, para evidenciar que en Galicia serían unhas 73.000.
E, tras sinalar que a media da UE é do 10 por cento, deu por feito que en España a porcentaxe subiría "tres ou catro puntos" a causa da crise e da reforma laboral.
Polos casos que manexa o seu sindicato, Mabel Pérez indicou que "o 95 por cento das mulleres non queren denunciar" por "medo" a perder o seu posto de traballo malia que, sostivo, si que existen "certas garantías" para aquelas que dean o paso.
"A PREVENCIÓN FUNCIONA"
Neste escenario, incidiu en que "a única forma" de que as mulleres teñan un ambiente laboral libre de acoso é a través da prevención, con protocolos similares aos de riscos laborais. Ao fío diso, lamentou que non sexan obrigatorios para todas as empresas e demandou que isto cambie.
E é que, como dixo, "a prevención funciona" e os protocolos, se ben "non acaban co acoso", si lograr "minimizalo substancialmente". Preguntada ao respecto, apuntou que as compañías grandes adoitan ter estes manuais dentro dos seus plans de igualdade, pero recordou que a maioría das empresas de Galicia son de pequeno tamaño.
En canto aos casos que coñece, comentou que se producen "en empresas grandes, pequenas e medianas" e mesmo en administracións públicas. "Tampouco a violencia de xénero ten clase", apostilou a sindicalista de Comisións Obreiras.
CASO BALTAR
Exposto isto, ambas as dúas dirixentes sindicais foron preguntadas sobre se a denuncia contra o presidente de Deputación de Ourense, Manuel Baltar (PP), se enmarcaría dentro desta categoría de acoso sexual no traballo.
Ao respecto, Mabel Pérez puntualizou que se trataría dun caso de "chantaxe" para obter un emprego por parte dunha persoa "con moito poder", se ben deixou claro que non coñece "en detalle" o asunto. Mónica Rodríguez pediu que se xulgue o que haxa que xulgar" tras asumir que "custa moito" ás mulleres "denunciar", tamén polo "cuestionamiento" ao que son sometidas.
"ALGO FALLA"
Adicionalmente, a representante de UGT recordou que 48 mulleres foron asasinadas polas súas parellas ou as súas exparellas no que vai de ano en España e censurou que Galicia é a terceira comunidade onde máis mulleres (6)perdieron a vida a causa da violencia machista.
Tamén tivo palabras para os seis nenos asasinados en toda España, dous en Galicia, e para os 44 que quedaron orfos como consecuencia da violencia de xénero.
Sobre os datos das mulleres, apuntou que "se reduciu case á metade" o número de asasinadas que denunciaran sobre o mesmo período do ano anterior, e o relacionou con que "non senten protexidas" cando delatan ao seu agresor. "Evidentemente, algo falla", subliñou ao indicar que tres das falecidas tiñan medidas de protección en vigor.
Ademais, Mónica Rodríguez reprobou que o 42 por cento das 721 ordes de protección solicitadas en Galicia no que vai de ano foron denegados; mentres tanto a Xunta como o Goberno reducen as súas partidas para igualdade e loita contra a violencia de xénero.
Fronte a iso, reclamou que se dispoñan os recursos necesarios para loitar contra esta lacra, máis apoio dende os ámbitos sanitario, policial, xurídico e social e que se traballe en prevención dende a educación.
