O conselleiro de Sanidade sostén que o sistema de Hemodinámica funciona "adecuadamente" en toda Galicia
SANTIAGO DE COMPOSTELA, 21 Abr. (EUROPA PRESS) -
O conselleiro de Sanidade, Jesús Vázquez Almuiña, asegurou que a decisión de a que área sanitaria van os pacientes con infarto en atención urxente depende en última instancia das decisións que adoptan os profesionais do 061 e "non tanto dunha derivación programada establecida".
Así respondeu á reivindicación do xefe do Servizo de Cardiología da xerencia compostelá, José Ramón González Juanatey que, en declaracións a Europa Press este xoves, urxía o traslado de pacientes con infarto da área sanitaria do Salnés ao Complexo Hospitalario de Santiago (CHUS), en lugar da Vigo para recibir atención.
Jesús Vázquez Almuiña, en resposta aos medios de comunicación antes de participar en Santiago na Reunión anual dos pediatras galegos de atención primaria, apuntou que as últimas decisións as toman os profesionais do 061, que son os que ven "onde está nese momento o paciente e onde están os medios operativos máis próximos para poder actuar", sen que niso interveña unha programación establecida.
"Por tanto, o 061, no momento no que ocorre o suceso toma a decisión de derivalo a este ou a outro hospital, non é tanto por unha derivación programada establecida, senón porque entende que é a mellor decisión para o paciente", asegurou.
Por iso, Almuiña pediu "a todos os profesionais, incluídos os Xefes de Servizo das áreas sanitarias", que "incorporen estas discusións a nivel técnico", e lembrou que existe un "programa importantísimo", o Progaliam, "que rexistra todos os datos e analízaos" --trátase do Programa galego de atención ao infarto agudo de miocardio--.
Ademais, apuntou que a Comisión formada polos cardiólogos de todas as áreas sanitarias, os profesionais do 061 e os dos servizos centrais, é o foro no que "se analizan os rexistros". Unha Comisión que, remarcou, reúnese "cada pouco tempo para analizar os datos" e achegar as "solucións necesarias".
En todo caso, Almuiña reivindicou que "Galicia ten uns índices de mortalidade por infarto baixos, moi por baixo do que solicita como nivel de calidade a sociedade española de cardiología".
HEMODINÁMICA
Ante a petición do doutor Juanatey de que se implante, como unha "prioridade", o servizo de Hemodinámica as 24 horas en Lugo e Ourense, Almuiña sinalou que a súa "opinión" responde ao que "digan os grupos" porque "non se pode falar de forma individual, é un sistema que ten os mellores índices de mortalidade a nivel español e tamén europeo e dentro deses grupos se toman decisións".
É "un sistema que funciona adecuadamente", remarcou, ademais de indicar que "o grupo tomou unha decisión, que foi a ampliación de horarios en Ourense e Lugo".
Así, en canto ás medidas que se poidan adoptar, indicou que será o grupo de traballo o que as determine para que despois a Consellería as incorpore, e instou a todos os profesionais do Sergas a achegar suxestións mediante esta vía para "mellorar o sistema".
