Bateu un "record" en stands expositores e permitiu a celebración de 400 reunións de traballo para produtoras e artistas de Galicia
SANTIAGO DE COMPOSTELA, 30 Oct. (EUROPA PRESS) -
O World Music Expo (Womex) 2014, que acolleu a pasada semana a cidade de Santiago de Compostela, "superou" as expectativas iniciais, xerando beneficios de preto de tres millóns de euros e 400 postos de traballo, 250 directos e 150 indirectos, durante a produción do evento.
Así explicouno este xoves o conselleiro de Cultura, Jesús Vázquez, que compareceu para facer balance do evento xunto coa xerente da Fundación Cidade da Cultura, Beatriz González Loroño, o director da Agadic, Jacobo Sutil, o representante da produtora Nordesía Antonio Martínez e a concelleira de Cultura de Santiago, María Antón.
Vázquez Abad explicou que a feira, da que se prevía nun inicio conseguir uns beneficios de 2,5 millóns, xerou finalmente uns recursos para Galicia próximos aos tres millóns de euros. Así mesmo, apuntou, congregou un 6,6 por cento máis de delegados que a edición anterior -- celebrada en Cardiff--, ata os 2.400; e a 1.470 empresas procedentes de case 100 países, un 16,6 por cento máis.
Proba do "éxito" obtido por esta cita, indicou o conselleiro, foron os mais de 200 xornalistas acreditados, así como o feito de que o Womex 2014 marcase "un record" en número de stands en funcionamento, 668 expositores de 47 países.
BENEFICIOS PARA EMPRESAS GALEGAS
O conselleiro recordou que a organización do Womex a través de empresas locais implicou a xeración de 400 postos de traballo, entre os directos e os indirectos. Nove de cada 10 euros invertidos na organización do evento tiveron como destino empresas e profesionais galegos.
En canto á presenza profesional galega, Jesús Vázquez recordou o "éxito" das actuacións de artistas como Davide Salvado, Uxía, Germán Díaz, Mercedes Peón, Xabier Díaz e Xosé Manuel Budiño.
O stand de GalicianTunes, no que operaron 21 empresas do sector así como colectivos profesionais, acolleu un total de 400 reunións de traballo de artistas e produtoras galegas con profesionais de Estados Unidos, Reino Unido, Israel, Francia ou Iberoamérica.
Ao mesmo tempo, o conselleiro destacou os "bos resultados" do programa Focus Galicia, organizado polo Agadic, no que 29 programadores de 17 países tiveron a oportunidade de coñecer a realidade musical galega. Neste marco iniciáronse as negociacións para a actuación de artistas galegos en Xapón, India, Brasil, Canadá, Marrocos, Irlanda ou Portugal.
No caso da cidade de Santiago de Compostela, a concelleira María Antón apuntou que o Womex supuxo entre un 20 e un 40 por cento de ocupación adicional para os hoteis, ao tempo que a restauración e o comercio se mostraron "francamente contentos" cos resultados.
UN "RETO" PARA A CIDADE DA CULTURA
Con esta cita, a Cidade da Cultura "enfrontábase a un reto", explicou Jesús Vázquez, quen considerou que "superou" a proba, tanto por servizos coma por "beleza arquitectónica".
"Celebrar o Womex nesta localización supuxo ofrecer ao mundo unha imaxe rotundamente contemporánea de Galicia" destacou o conselleiro, que eloxiou ademais "a forza e a beleza arquitectónica" do complexo, que "supuxo un plus enriquecedor".
Os "bos resultados" alcanzados animan así mesmo á Consellería de Cultura a "considerar novas posibilidades" de cara ao futuro no "ámbito das grandes citas culturais" para a Cidade da Cultura.
