Unha disposición adicional á lei de medidas indica que o obxectivo é "reducir o volume de compromisos de gasto"
SANTIAGO DE COMPOSTELA, 20 Oct. (EUROPA PRESS) -
A Xunta de Galicia introduce un novo cambio no contrato da autovía da Costa da Morte, e faino a través dunha disposición adicional á lei de medidas fiscais e administrativas que presentou este luns no Parlamento xunto ao proxecto de presupostos para 2015.
En concreto, o Goberno galego resolve parcialmente o contrato de concesión da obra pero aboará a concesionaria "o importe dos investimentos xa realizados", a xeito de "compensación".
A resolución prodúcese no relativo a dous tramos, o desdobramento entre os enlaces de Baio norte-Santa Irene e da autovía entre os enlaces de Santa Irene e Berdoias. O seu obxectivo, segundo recolle esta disposición adicional quinta, é "reducir o volume de compromisos de gasto que se derivan deste contrato".
Así, e "en articulación dos principios de estabilidade presupostaria e sostenibilidade financeira", o Executivo establece na norma que a devandita modificación responde á atención "á concorrencia de razóns de interese xeral".
ADAPTACIÓN DO PLAN ECONÓMICO FINANCEIRO
Xa nun segundo punto, indica que o plan económico financeiro da concesión "deberá adaptarse" para "restablecer" dito equilibrio económico e "recoller en todo caso, mediante os oportunos axustes, os efectos derivados da diminución dos custos de obras, de explotación, financeiros e outro".
Como "compensación" ao concesionario "por todos os conceptos derivados da presente disposición", apunta que "a retribución económica prevista no indicado plan en concepto de canon de dispoñibilidade integrará (...) o importe dos investimentos xa realizados por razón da expropiación de terreos e execución das obras de construción nas actuacións obxecto de resolución".
