Ulloa apunta que "por unha alerta infundada que este verán apareceu nos medios" se quintuplicaron os avisos e "moitos" foron falsos
SANTIAGO DE COMPOSTELA, 21 Oct. (EUROPA PRESS) -
A directora xeral de Produción Agropecuaria, Patricia Ulloa, informou de que se retiraron 376 niños de avespa asiática ('vespa velutina') dende que se detectaron os primeiros casos desta especie invasora en Galicia en outono de 2013, e se capturaron case 1.000 avespas obreiras que caeron nas trampas dispostas por toda a Comunidade galega.
En resposta a dúas preguntas acumuladas na comisión de Agricultura do Grupo Popular e AGE, Ulloa defendeu que o protocolo de actuación da Xunta, activado en febreiro deste ano, contra a avespa asiática "está a funcionar perfectamente", aínda que recoñeceu que erradicar a este insecto de Galicia "é un desafío totalmente imposible", xa que "non aconteceu en ningún sitio" e puxo como exemplo que a súa eliminación total non se conseguiu en lugares nos que apareceu como Francia ou outras comunidades autónomas.
Por iso, cre que hai que "convivir" con esta especie, controlando "que non faga estragos que poidan afectar á saúde pública" e a produtores, ao tempo que recordou que "non é máis perigosa que a de avespa autóctona". Así, sinala que o seu hábitat se atopa por debaixo dos 400 metros de altitude (as retiradas de colmeas realizouse mayormente na costa de Lugo e o Sur da provincia de Pontevedra), mentres que "as principais zonas produtivas de mel" se atopan na montaña lucense e ourensana, polo que non se ven afectadas, segundo expuxo.
Ademais, chamou a atención sobre que "por unha alerta infundada que este verán apareceu nos medios de comunicación se quintuplicaron os avisos de avespa", de forma que a capacidade de viuse minguada" para atallala, xa que "moitos dos avisos non eran de velutina". Así as cousas, os teléfonos do 012 e 112 recibiron 1.702 avisos por esta avespa, dos cales se confirmou á súa presenza en 614 casos, con 72 casos de exemplares soltos sen estar en niños.
No tocante aos protocolos, Ulloa subliñou que se segue unha vixilancia entomolóxica de dous tipos: a activa -trampeo específico en determinadas zonas- e a pasiva -avisos de cidadáns--, ao que se unen outras actividades de tipo informativo. Ademais, pon en valor que se retiren colmeas de día, posto que é cando se atopan as avespas raíña, que son as que teñen capacidade de crear novos niños.
Ao respecto, o deputado de AGE queixouse de que non se achegara ningún dato sobre planificación, persoas implicadas nos traballos ou afectación a produtores, ao tempo de que alertou de que en 2020 as avespas asiáticas "poden substituír ás autóctonas", por iso esixe control para que non se convertan nas predominantes.
PROPOSICIÓN SOBRE ABELLAS
Nesta comisión presentáronse tres proposicións non de lei presentadas por PSdeG, AGE e BNG, que versaron sobre axudas a explotacións gandeiras de montaña, medidas ante a baixada de prezos do leite e contra a proliferación da avespa asiática. Todas elas foron rexeitadas polo PPdeG tras presentar emendas que non foron aceptadas.
O Bloque presentou unha iniciativa para poñer couto á invasión de abellas asiáticas a través dunha actuación preventiva e planificada. Sobre este extremo, a deputada Tereixa Paz pide que "se actúe inmediatamente na fase de elaboración das súas primeiras colmeas", que son máis doados de atallar porque a súa eliminación posterior "pode ser aínda máis difícil do que xa é actualmente".
A postura dos populares expúxoa José Manuel Balseiro, quen presentou unha emenda de substitución para que se pida "continuar" cos labores da Xunta, xa que o que demanda o BNG "se está a facer", posto que "se están a atender avisos" nun prazo de entre 24 e 48 horas".
Pola súa banda, o deputado socialista Pablo García expuxo que os produtores se queixan de que falta un protocolo "real, claro e concreto" para poñer remedio a esta problemática que pon en risco a súa forma de vida, ante unha especia depredadora.
PREZO LEITE
Noutra orde de cousas, o deputado de AGE Antón Sánchez levou unha iniciativa ao Parlamento galego para que se estableza un sistema fiable de estimación de custos de produción no sector lácteo que sirva de referencia para contratos de venda, xa que os gandeiros están sen medidas para defenderse "dos abusos" das industrias. Así, búscase que os produtores poidan "percibir un prezo xusto" por enriba dos custos de produción, debido a que dende xaneiro os prezos foron baixando ata rexistrar en Galicia "os máis baixos de Europa".
Nesta liña, pide unha "mediación da Administración para que se negocien os contratos en igualdade de condicións" e esixe ao Estado un sistema de arbitraxe con capacidade normativa e sancionadora.
O PPdeG presentou emenda, rexeitada por AGE, nunha exposición na que a deputada popular Isabel García Pacín reprochou a Alternativa que "non se pode dicir que non se fixo nada, por Deus". "Perdóeme a mención do Santísimo", exclamou Pacín, quen puxo como exemplo da xestión da Xunta as súas reunións co sector ou a posta en marcha da Xacobea -ferramenta de referenciación de prezos lácteos--.
Na quenda de réplica, Sánchez espetou que "os que apelaban a Deus queimaban aos que dicían que a terra era redonda e non plana" e "anos despois teñen que ir dando a razón" porque "a realidade é moi testana". "Eu son máis do método científico", díxolle a García Pacín, e "os datos son os que son", posto que a industria "impón" os seus prezos.
Pola súa banda, Tereixa Paz (BNG) denunciou que na actualidade "a industria impón condicións e aos produtores non lles queda outra que asumir". Ademais, criticou que "ao señor Feijóo non lle espera" ante o novo escenario sen cotas a partir de abril de 2015, e reclamou que "actuei ante o espolio ao sector lácteo".
O deputado socialista Pablo García lamentou que "non hai estratexia" respecto ao sector lácteo por parte da Xunta, e é que cree que aínda que "Feijóo, que é o señor máis guapo, máis listo da política española,", "seguramente tería capacidade política" para impoñer" ao resto do Estado unha liña política, pero "non a ten".
AXUDAS RURAL
O PSdeG presentou unha iniciativa debido a que nas últimas semanas numerosos produtores de gando vacún recibiron comunicación da Xunta na que denega diversas axudas en concepto de indemnización a agricultores polas dificultades en zonas desfavorecidas de montaña.
Ao respecto, os socialistas sinalan que nos próximos sete anos se van xubilar o 40% dos gandeiros e agricultores galegos, mentres só se van incorporar ao campo apenas un 2,5% do censo de 2013, e recordou que o 40% das explotacións das zonas desfavorecidas de montaña viven destas axudas.
A esta proposta presentou unha emenda o Grupo Popular, que os socialistas non aceptaron porque "hai que clarificar" cánto diñeiro hai e para cantas explotacións "e cumprilo despois". Sobre esta cuestión, a deputada popular Isabel García Pacín recordou que esta é unha "orde de concorrencia competitiva" e por iso hai gandeiros que quedan fóra dela.
A deputada do BNG Tereixa Paz denunciou "o machadazo a gandarías autóctonas" da Xunta, nas que o 75% dos gandeiros que tiñan un contrato de cinco anos para introducir razas autóctonas "deixaron de percibir as axudas da Consellería de Medio Rural", a pesar de que están financiadas a cargo do PDR (Plan de Desenvolvemento Rural)". Pola súa banda, Antón Sánchez recriminou ao PP que "coas súas políticas están a expulsar a xente destas zonas" do rural.
