Traslada en Bruxelas o impacto que ten para a economía galega, de 535 millóns e sobre 44 sectores de actividade
SANTIAGO DE COMPOSTELA, 24 Abr. (EUROPA PRESS) -
A conselleira do Mar, Rosa Quintana, regresa de Bruxelas "coa tranquilidade" de saber que a pesca está a ser considerada "motivo fundamental" en "todas as negociacións" relativas ao 'Brexit'.
Quintana, que se reuniu este martes coa directora de Política Pesqueira do Atlántico, Mar do Norte, Báltico e Rexións Ultraperiféricas, Helene Clark, e con representantes do Task Force do 'Brexit', trasladoulles o informe elaborado en Galicia sobre o impacto que a saída de Reino Unido pode ter na economía galega.
"Viñemos trasladar aquí as nosas preocupacións", explicou en declaracións aos medios de comunicación após os encontros, cando se mostrou con esa "tranquilidade" e tamén "coa satisfacción de ver que lles gustou o informe".
De 96 barcos que faenan no Gran Sol, 66 son galegos, e o impacto económico que ten esta actividade pasa dos 535 millóns de euros, segundo os datos que destacou a conselleira.
Ademais, indicou que de 88 sectores de actividade, esta frota ten un impacto en 44, 27 deles de carácter "netamente" industrial, de "alta tecnoloxía", e 17 da área de servizos, desde os xurídicos aos transportes, pasando polo gasoil.
140 MILLÓNS EN SALARIOS
"Estamos a falar de 140 millóns de euros en salarios do ano 2016 e estamos a falar de máis de 23 millóns de euros de cotización á Seguridade Social", salientou.
Sobre o que lle comunicaron, a titular de Mar dixo que os responsables comunitarios "dan unha mensaxe de tranquilidade" porque "as cousas de momento van ben, a pesca non está esquecida, todo o contrario, forma parte da primeira liña das negociacións". "Imos seguir traballando con eles", subliñou.
De momento, segundo a conselleira, "está todo aberto" e "a pesca está a ser elemento fundamental de negociación". "Nós recollemos todas as situacións, sobre o mercado interior, o acceso ás augas.... Esperemos que estes datos axuden a poder negociar", engadiu.
Nunha comunidade "tan pequena" como a galega, Quintana salientou que os números achegados "é dicir moito". Por iso, valorou que o ministerio tamén "está a trasladar esta mesma liña de argumentación cada vez" que acode a Bruxelas.
Por parte de Bruxelas, "quedaron en estudar e ler" o informe feito por Galicia, que, pola súa banda, contempla a "posibilidade de abundar nalgún dato máis, algún estudo máis". "Imos falalo co sector e ver se podemos seguir achegando cousas. Temos tempo", expuxo a responsable de Mar.
Como meta máis favorable, a Xunta fíxase lograr o "status quo" despois do 'Brexit'. "Hai que pelexalo. Non hai ningún reto imposible se se traballa ben", finalizou a conselleira.
Por outra banda, preguntada polo acordo con Marrocos, respondeu que "claro" que lle preocupa e que espera "que se poida reeditar o máis rápido posible".
