SANTIAGO DE COMPOSTELA, 25 Nov. (EUROPA PRESS) -
A Xunta de Galicia e as tres universidades galegas participaron este xoves na apertura dunha nova campaña que levará polos sete campus galegos a loita contra a violencia de xénero co obxectivo de concienciar a un dos sectores que máis preocupa á administración, os mozos.
A mesa informativa desta campaña quedou instalada na Biblioteca Concepción Areal de Santiago con motivo da conmemoración do Día de Loita contra a Violencia de Xénero este 25 de novembro, nun acto no que participaron representantes das tres universidades, membros de Abanca e El Corte Inglés, o vicepresidente da Xunta, Alfonso Rueda, e a secretaria xeral de Igualdade, Susana López Abella.
Durante o evento, o reitor da USC, Juan Viaño, destacou a responsabilidade das universidades na formación dos mozos "non só en coñecementos", senón tamén "en valores" e destacou instrumentos "fundamentais" como o Plan de Igualdade desta universidade.
Pola súa banda, o reitor da Universidade da Coruña, Xosé Luis Armesto, recordou que a violencia de xénero "afunde as súas raíces" na discriminación entre homes e mulleres e garantiu o seu "compromiso" neste tipo de actuacións, dado que "algo está a fallar no sistema educativo" se se repiten roles de xénero pasados.
Finalmente, Dolores González, vicerreitora de Estudantes da Universidade de Vigo, indicou que "erradicar a violencia de xénero é unha responsabilidade de todos" e precisou que, para iso, "non chega só con leis", senón que é "fundamental" a educación.
UN "ENORME PROBLEMA"
O vicepresidente da Xunta lamentou que ano tras ano a sociedade teña que admitir que hai "un enorme problema" que continúa activo, como é a violencia de xénero, e apostou por "acordarse" durante os 365 días do ano que "a desigualdade segue estando presente".
Nun lugar como a universidade, explicou "onde se forman as xeracións do futuro" un problema como este "debería estar en vías de superarse". Non obstante, Rueda admitiu que isto "non é así", polo que instou a seguir traballando para erradicar este tipo de comportamentos dende o segmento de poboación máis nova.
A campaña, que insta a dicir 'Stop ao mal amor', está composta por unha mesa informativa que pasará polos sete campus galegos con información sobre programas existentes para vítimas e agresores -como Abramos ou Círculo ou de atención psicolóxica a mulleres-, pautas para detectar comportamentos violentos e información sobre plans de igualdade. Os mozos poderán, ademais, facerse un 'selfie' contra a violencia de xénero con atrezzo preparado para a ocasión.
