Asturies presenta la Estratexa de normalización del asturianu y el eonaviegu con 245 midíes hasta 2030

   UVIÉU, 20 Feb. (EUROPA PRESS) -

   El Gobiernu del Principáu presentó esti vienres la Estratexa de normalización del asturianu y del eonaviegu 2026-2030, un plan de planificación a cuatro años qu'articula 245 midíes alredor de cinco grandes exes: l'usu institucional y alministrativu, la tresmisión intergeneracional vinculada a la enseñanza y la mocedá, la cultura, el deporte y l'ociu, la economía y los medios de comunicación, y la promoción esterior.

   La conseyera de Cultura, Política Llingüística y Deporte, Vanessa Gutiérrez, esplicó qu'esta Estratexa plantega una planificación a cuatro años con oxetivos "bien xenéricos" qu'afecten a ámbitos como la educación, l'alministración, la empresa, la cultura, el turismu y la proyección esterior, y prevé tanto nueves iniciatives como l'afitamientu y ampliación de programes yá en marcha.

   Nel ámbitu educativu, el plan busca reforzar la enseñanza a tolos niveles y a toles edaes, tanto na formación reglada como na voluntaria pa persones adultes, amás de promover recursos pa la capacitación de profesionales de l'alministración.

   Ente les llinies d'actuación figura tamién l'impulsu al usu de les llingües propies nel ámbitu empresarial, con iniciatives como la marca 'Alfaya', un distintivu pa reconocer el grau d'implicación de les empreses que trabayen n'asturianu.

   El documentu contempla tamién reforzar la collaboración con instituciones estatales y organismos culturales p'ampliar la presencia nacional y internacional de les llingües propies, asina como caltener como irrenunciable la reclamación al Ministeriu d'Educación de la especialidá docente d'asturianu. Según indicó la conseyera, esi pidimientu va siguir siendo recurrente hasta la so consecución.

OFICIALIDÁ DEL ASTURIANU

   Pela so parte, el presidente del Principáu, Adrián Barbón, defendió que la estratexa naz del convencimientu de que les llingües nun se salven soles y riquen planificación, protección y garantíes. L'oxetivu, según señaló, ye que s'aprendan meyor, que s'usen más, que se sientan nel día ente día y que'l derechu a utilizales pueda exercese en cualquier ámbitu de la vida.

   Barbón sorrayó l'aumentu de la matrícula n'asturianu, que cifró nun 34,2% esti cursu, y afirmó que l'Executivu va siguir avanzando na reconocencia y garantía de los derechos llingüísticos. "Normalizar nun supón imponer, sinón permediar desigualdaes históriques", señaló.

   A lo último, el presidente repitió que la meta del Gobiernu sigue siendo la oficialidá del asturianu y el eonaviegu: "Mentanto, vamos siguir avanzando ensin arrenuncios, con serenidá y con ambición. Sabemos que protexer les nuestres llingües ye protexer lo que somos", concluyó.

LLEI DE CULTURA Y IDENTIDÁ

   En paralelu, l'Executivu trabaya na nueva Llei de Cultura y Identidá que, tal qu'adelantró la Conseyera espérase aprobar nel primer semestre del próximu añu.

   Según Gutiérrez, esta normativa va ser bien ambiciosa y pionera nel ámbitu estatal al combinar la protección de los derechos culturales --incluyíos los derechos llingüísticos-- cola reordenación del sistema públicu de cultura.

   Ente les sos exes figura la creación d'una Axencia de les industries culturales pa reorganizar estructures esistentes y ameyorar la xestión de los recursos públicos.