Asturies va recibir la ponte de Selmana Santa con temperatures máximes d'hasta 25 graos y sol

   UVIÉU, 30 Mar. (EUROPA PRESS) -

   La previsión meteorolóxica pa los díes centrales de la Selmana Santa n'Asturies envalora una xubida de les temperatures y ausencia d'agües fuertes, según l'Axencia Estatal de Meteoroloxía (Aemet), que prevé temperatures mínimes de 9 graos y máximes que puen algamar los 25 graos.

   Al entamu de la selmana va haber cielos nublos, dalguna agua y temperatures baxes, con máximes de 14 y 15 graos na mayoría de zones d'Asturies, conforme meyora la Selmana Santa les temperatures van dir aumentando nel conxuntu del territoriu asturianu.

   Asina, el Miércoles Santu dirán abriéndose grandes claros nes hores centrales del día, con temperatures máximes de 17 graos en Cangas o Llangréu, y de 16 n'Uviéu, Xixón y Avilés. Nel Oriente esperen temperatures de 14 graos.

   El Xueves Santu, entamu de la ponte festiva n'Asturies, van baxar llixeramente les temperatures máximes a 14 graos na zona central, 15 nel occidente y 14 nel oriente. Nun se refuguen agües débiles nel oriente.

   El Vienres Santu les temperatures van dir n'aumentu nel conxuntu del Principáu d'Asturies, con máximes de 19 graos en Cangas y Llangréu, 18 n'Uviéu, 17 en Xixón, 16 n'Avilés y 15 en Llanes. Según l'AEMET, nun s'esperen precipitaciones.

LOS TERMÓMETROS VAN SUPERAR LOS 20 GRAOS EL SÁBADU

   Yá'l Sábadu Santu los termómetros van superar los 20 graos en prácticamente la totalidá d'Asturies, con cielos estenos y sol en tol territoriu. Les temperatures máximes espérense en Cangas y Llangréu, con 26 graos, ente que n'Uviéu van llegar a los 25 graos, 23 n'Avilés y 22 en Xixón. En Llanes van algamase 20 graos y en Navia, 23 de máxima.

   El Domingu de Resurrección l'AEMET espera una baxada xeneralizada de temperatures, con máximes de 20 graos en Cangas, y de 17 n'Uviéu, Xixón y Avilés. Amás, en Llanes el termómetru va baxar a los 16 graos y en Llangréu va quedase en 18. El domingu esperen cielos nublos nel conxuntu d'Asturies, ensin precipitaciones.