Actualizado 13/12/2018 09:03 CET

Berta Piñán presenta la so primer novela esti fin de selmana

Como la muda al sol d'una llagartesa.
HOJA DE LATA.

UVIÉU, 13 Dic. (EUROPA PRESS) -

Berta Piñán, ún de los nomes más importantes de les lletres asturianes acaba de publicar la so primer novela, 'Como la muda al sol d'una llagartesa'. La obra, ganadora del Premiu Xosefa Xovellanos, va presentase esti vienres en Xixón y el sábadu n'Uviéu.

Trátase d'un thriller rural merecedor del premiu de más prestixu de les lletres asturianes y protagonizáu por Xuana Salabert, una muyer xubilada qu'atopa'l cadabre d'una mocina. Enantes de que Xuana pueda dar parte a les autoridaes, un golpe na tiesta déxala inconsciente. Cuando recupera'l sentíu, el cuerpu ensin vida d'aquella neña yá nun ta ellí.

La vida tranquila nel campu de Xuana vese alteriada, anque cuenta cola ayuda incondicional de la so vecina, Taresa, muyer de sabiduría televisiva con un instintu natural pa ver el peligru, y de los guardies civiles del cuartel de la Villa, que por fin tienen un casu que los saque de la so rutina.

Berta Piñán (Cañu, Cangues d'Onís, 1963) ye una de les voces de más prestixu de les lletres asturianes. A pesar que la so obra abarca dende l'ensayu sociollingüísticu hasta la lliteratura infantil y xuvenil, Piñán considérase poeta penriba de too y tien ganáu ún de los más prestixosos premios d'Asturies, el Teodoro Cuesta con 'Vida privada' (1991).

Les sos escases incursiones na narrativa cuenten tamién col reconocimientu del públicu y la crítica, casu de 'La tierra entero'(1996) o 'La maleta al agua' (2005). Nel xéneru infantil y xuvenil tien ganaos los premios María Xosefa Canellada con 'Agua, arroz y maíz' (2008) y el de la Crítica d'Asturies en dos ediciones consecutives con 'Les coses que-y presten a Fran' (2008) y 'L'estranxeru' (2009).

'Como la muda al sol d'una llagartesa' ye la so primera novela, una de les poques escrites n'asturianu por una muyer y la segunda que se fai col Xosefa Xovellanos d'autoría femenina.

La presentación en Xixón va ser el vienres 14 d'avientu a les 19.30 na Antigua Escuela de Comerciu. Per otru llau, n'Uviéu l'actu va facese al otru día a les 12.30 y na Biblioteca de La Granxa.

Asturianu ofrecido por