OVIEDO, 20 Dic. (EUROPA PRESS) -
La conseyera de Facienda y Sector Públicu d'Asturies, Dolores Carcedo, retrucó esti vienres a los grupos parlamentarios de la oposición Foru Asturies, PP, IU y Mistu-UPyD, que les sos propuestes pal proyectu de presupuestos autonómicos pal 2014 son "irreales" nel actual contestu de crisis económica y nun valen p'Asturies.
"Cómo une'l non", llamentó la conseyera socialista mientres el debate d'enmienda de totalidá, reclamando a Foru, PP y UPyD que seyan "realistes" y entiendan que baxar los impuestos nestos momentos sería "una irresponsabilidá" porque supón perder ingresos cuando se precisen "tolos recursos". De la mesma, contestó a IU que nun val de nada proponer subíes d'impuestos que nun suponen una recaudación real.
D'esta manera, aseguró que colos argumentos de los grupos de la oposición "nun hai blimes pa facer un presupuestu". Coles mesmes, defendió que'l sector públicu asturianu ye reducíu y que'l Gobiernu asturianu tien una capacidá d'actuación "bien llendada" en política fiscal, resaltando que'l Gobiernu d'Asturies ye la cuarta comunidá menos empeñada d'España. "Llamento que nun llegáramos a un acuerdu, pero nun ye tiempu pa llamentos. El gobiernu va siguir trabayando", dixo.
Según el diputáu socialista José María Pérez, les razones d'IU y UPyD contra'l proyectu presupuestariu "nun son les cifres sinón reformar llei electoral". "El PSOE cumplió lo que pactó", repitió, reprochando que la so intención paez ser "dar una mocada al Gobiernu". Per contra, diz entender el "llexítimu" refugu de Foru y PP a les cuentes porque los sos planteamientos son "contrarios" a los de los socialistes.
Andalucía
